5 ёшли қизнинг зўрланиши: гумон қилинган боғча ходимлари ишдан бўшатилди
Ҳолат юзасидан Мактабгача ва мактаб таълими вазирлиги томонидан Ишчи гуруҳ тузилди.
Наманган вилояти Учқўрғон туманидаги давлат мактабгача таълим ташкилотида юз берган нохуш ҳолатни атрофлича ўрганиш мақсадида Мактабгача ва мактаб таълими вазирлиги томонидан Ишчи гуруҳ тузилди.
Ишчи гуруҳ томонидан воқеа ҳолатлари, шунингдек, масъул ходимларнинг хизмат вазифаларига лойиқлиги ўрганилмоқда.
Вазирлик маълумотига кўра, воқеага алоқадор ҳамда хизмат вазифаларига масъулиятсизлик билан ёндашган ходим ва мансабдор шахсларга нисбатан ваколат доирасида тегишли чоралар кўрилади. Айбдорлар қонунчиликда белгиланган тартибда жазоланиши таъминланади.
Шунингдек, таълим ташкилотининг воқеага дахлдор деб гумон қилинган ходимлари билан тузилган меҳнат шартномалари бекор қилинган.
Бундай ҳолатларнинг бошқа мактабгача таълим ташкилотларида такрорланишининг олдини олиш мақсадида вазирликнинг махсус Ишчи гуруҳи томонидан мамлакатдаги давлат боғчалари ходимлари ҳам текширувдан ўтказилмоқда.
Вазирлик ҳолат юзасидан барча зарур чоралар кўрилаётганини маълум қилди.
Эслатиб ўтамиз, аввалроқ Наманганда боғча омбор мудири тарбияланувчи 5 ёшли қизни зўрлагани хабар қилинган эди.
