Сурхондарёда ер олди-сотдиси ортидан можаро: 32 ёшли эркакни калтаклаб ўлдирган беш киши қамалди

Сурхондарё вилояти Денов туманида ер олди-сотдиси бўйича келишмовчилик ортидан 32 ёшли эркакнинг калтаклаб ўлдирилиши юзасидан суд ҳукми чиқарилди. 

 

Иш ҳужжатларига кўра, Янгиҳаёт маҳалласида яшовчи, 1989 йилда туғилган шахс мулкий низони зўравонлик йўли билан ҳал қилишга қарор қилган. У 22–30 ёшдаги тўрт нафар танишини ҳам жалб қилган.

 

Улар 27 апрель куни соат 17:30 атрофида Lacetti ва Nexia автомобилларида Боғишамол маҳалласидаги автомобиль ювиш шохобчаси олдига бориб, у ерда бўлган икки нафар қариндошини калтаклаган.

 

Шундан сўнг улардан бири мажбуран Lacetti автомобилига ўтқазилиб, Узун туманидаги Боботоғ ҳудудига олиб борилган. У ерда унинг танасига оғир тан жароҳатлари етказилган. Гувоҳларнинг кўрсатмаларига кўра, жабрланувчига электрошокер ёрдамида ҳам таъсир ўтказилган.

 

Оғир тан жароҳатлари олган 32 ёшли эркак Денов туман тиббиёт бирлашмасининг шошилинч тез тиббий ёрдам бўлими кириш қисмига ташлаб кетилган. 

 

Шифокорлар томонидан реанимацион чоралар кўрилган, бироқ унинг ҳаётини сақлаб қолишнинг имкони бўлмаган ва биологик ўлим қайд этилган.

 

Судда аниқланишича, жабрланган икки киши ота-бола бўлиб, улар гуруҳ ташкилотчисининг тоғаси ва жияни бўлган. Низо ер олди-сотдиси масаласидаги келишмовчилик сабаб юзага келган.

 

Бундан ташқари, иш ҳужжатларига кўра, гуруҳ ташкилотчисининг хонадонидан 6 граммдан ортиқ турли кўринишдаги гиёҳвандлик воситалари аниқланган.

 

Суд ҳукмига кўра, беш нафар судланувчига 4 йилдан 9 йилгача озодликдан маҳрум қилиш жазоси тайинланган. Жиноят кодексининг 59-моддасига мувофиқ, жазолар қисман қўшилган ва айрим судланувчига узил-кесил 9 йил муддатга озодликдан маҳрум қилиш жазоси белгиланган.