Сирдарёдаги янги ИЭС да авариявий ўчиш: Қозоғистон ҳам “светсиз” қолди

25 сентябрь куни соат 05:05 да Сирдарё вилоятида жойлашган EDF компаниясига тегишли янги иссиқлик электр станциясида 1600 МВт қувват авариявий тарзда ўчди. Бу ҳақда Энергетика вазирлиги хабар берди.

Қайд этилишича, айни вақтда станцияда синов-созлаш ишлари олиб борилмоқда.

Станциянинг авариявий ўчиши ортидан аварияга қарши автоматика ишга тушиб, республиканинг айрим ҳудудларида электр таъминоти вақтинча узилган. Жумладан, қишлоқ хўжалигида фойдаланиладиган сув насослари ҳамда аҳоли истеъмолчиларининг электр таъминотида узилишлар кузатилган.

Электр таъминотини тиклаш жараёнида энергия сақлаш тизимлари ва электр станцияларидаги захира қувватлар ишга туширилиб, истеъмолчилар босқичма-босқич тармоққа уланган. Ҳозирда электр таъминотидан узилган барча истеъмолчилар тармоққа қайта уланган.

Мазкур ҳодиса Қозоғистон энергетика тизимига ҳам таъсир кўрсатган. Cоат 05:02 да Ўзбекистон энергия тизимида 1516 МВт қувват ишлаб чиқаришнинг узилиши Марказий Осиё энергия тизимида электр энергияси оқимининг кескин ўзгаришига сабаб бўлган. Натижада Шимол-Жануб транзитида бўлиниш юзага келган.

Қозоғистон энергетика тизимида истеъмолчиларга қўйилган чекловлар ҳажми 962 МВтни ташкил этган. Фавқулодда вазиятларни бошқариш автоматикаси — автоматик частотали тушириш (АФР) ва махсус автоматик юкламани ўчириш (САОН) тизимлари одатий режимда ишлагани қайд этилган.

Соат 05:43 да Қозоғистон ягона энергия тизимининг Жанубий зонаси ҳамда Марказий Осиё ягона энергия тизимининг Қозоғистон энергетика тизими билан параллель ишлаши қайта тикланган. Шундан сўнг истеъмолчиларга қўйилган чекловларни олиб ташлаш бўйича буйруқ берилган.