Электр таъминотидаги узилишлар вақтида бартараф этилмаса, компенсация тўланади

 

Ўзбекистонда электр таъминотидаги узилишлар белгиланган муддатларда бартараф этилмаса, истеъмолчиларга компенсация тўлаш механизми жорий этилади. Бу президентнинг 22 сентябрь куни имзоланган ПФ-202-сон фармонида белгиланган.

 

Унга кўра, 2026 йил декабргача электр таъминотидаги узилишларни белгиланган муддатларда бартараф этмаганлик учун истеъмолчиларга компенсация тўлаш механизмини назарда тутувчи ҳужжат лойиҳаси ишлаб чиқилади.

 

Лойиҳа манфаатдор вазирлик ва идоралар билан келишилган ҳолда Вазирлар Маҳкамасига киритилади. Ушбу вазифага Иқтисодиёт ва молия вазирлиги, Энергетика вазирлиги ҳамда Рақобатни ривожлантириш ва истеъмолчилар ҳуқуқларини ҳимоя қилиш қўмитаси масъул этиб белгиланган.

 

Шунингдек, табиий газ етиб бориши қийин бўлган ҳудудларни электрлаштириш бўйича чора-тадбирлар жадаллаштирилади.

 

2026 йил ноябрь ойида ушбу йўналишда тажрибали консультантларни жалб қилиш мақсадида халқаро молия институтлари билан музокаралар ўтказилади. Декабрь ойида эса халқаро молия институтларининг техник кўмагида консультантлар жалб қилинади.

 

2027 йил февралига қадар консультантлар иштирокида табиий газ етиб бориши қийин бўлган ҳудудларни электрлаштириш концепцияси ишлаб чиқилади.

 

Концепцияда, жумладан, электрлаштириладиган истеъмолчилар, шунингдек, табиий газ таъминоти мавжуд бўлмаган ва иситиш учун электр энергиясидан фойдаланаётган истеъмолчилар учун электр энергиясининг имтиёзли тарифларини белгилаш назарда тутилади.

 

Бундан ташқари, электрлаштириш натижасида алмаштириладиган энергия самарадорлиги юқори бўлган маиший техникаларни харид қилишни қўллаб-қувватлаш механизмлари жорий этилади.

 

2027 йил апрель ойида тегишли ҳужжат лойиҳаси ишлаб чиқилиб, белгиланган тартибда Вазирлар Маҳкамасига киритилади.

 

Мазкур вазифаларни амалга ошириш учун Энергетика вазирлиги, Иқтисодиёт ва молия вазирлиги ҳамда Энергия самарадорлиги миллий агентлиги масъул этиб белгиланган.