Шавкат Мирзиёев Кобахидзени таваллуд куни билан табриклади
Ўзбекистон ва Грузия Поти ва Анаклия портлари инфратузилмасидан самарали фойдаланиш орқали транспорт алоқаларини ривожлантиришни муҳокама қилди.
Шавкат Мирзиёев Грузия Бош вазири Ираклий Кобахидзе билан телефон орқали мулоқот қилди.
Суҳбат аввалида давлат раҳбари Ираклий Кобахидзени таваллуд куни билан самимий табриклаб, унга мустаҳкам соғлиқ, Грузия халқига эса фаровонлик ва бардавом равнақ тилади.
Мулоқот давомида Ўзбекистон–Грузия стратегик шериклик муносабатларини янада ривожлантириш масалалари муҳокама қилинди.
Хусусан, жорий йил 2–3 июль кунлари Ўзбекистон Президентининг Грузияга давлат ташрифи якунлари бўйича эришилган келишувларни амалий жиҳатдан рўёбга чиқаришга алоҳида эътибор қаратилди.
Суҳбатда ўзаро савдо ҳажмини ошириш, саноат кооперациясини кенгайтириш, шунингдек, Грузиянинг Поти ва Анаклия портлари инфратузилмасидан самарали фойдаланиш орқали транспорт жиҳатидан ўзаро боғлиқликни кучайтириш масалаларига алоҳида эътибор қаратилди.
