Токиода 34 кунлик рекорд: ёмғирсиз кун бўлмади
Токио марказида 27 августдан 29 сентябргача ҳар куни ёғингарчилик қайд этилган.
Япониянинг Токио шаҳрида кетма-кет 34 кун давомида ёмғир ёғиб, рекорд натижа қайд этилди. Япония метеорология агентлиги маълумотларига кўра, бу 1886 йилдан буён кузатилган энг узоқ узлуксиз ёғингарчилик даври ҳисобланади.
Токио марказида ёғингарчилик 27 августдан 29 сентябргача давом этган. Шу тариқа 2019 йилда 27 июндан 29 июлгача қайд этилган 33 кунлик аввалги рекорд янгиланган.
Метеорологлар узоқ давом этган ёмғирли об-ҳавони кузги ёмғир фронтлари, узоқ вақт сақланиб турган паст босим ҳудудлари ҳамда яқинлашган тайфунлар билан изоҳламоқда.
Токиода сентябрь ойининг 29-санасигача 629 миллиметр ёғин қайд этилган. Бу шаҳарнинг сентябрь ойидаги ўртача ёғин миқдоридан қарийб уч баравар кўп.
Ёғингарчилик миқдори 21 сентябрь куни айниқса юқори бўлган ва бир суткада 156 миллиметр ёғин тушган.
Узоқ давом этган булутли ва ёмғирли об-ҳаво қуёшли кунлар давомийлигига ҳам таъсир кўрсатган. Шунингдек, Япония шарқида, жумладан Канто минтақасида, ёмъирлар давом этиши кутилмоқда.
Япония метеорология агентлиги маълумотларига кўра, мамлакатнинг айрим ҳудудларида кучли ёғингарчилик ва тайфунлар билан боғлиқ ноқулай об-ҳаво кузатилмоқда.
