Россияда «ўлат хавфи» сабаб бир қатор шифохоналар карантинга олинди
Бунга 28 ёшли тиббиёт ходимининг вафот этгани сабаб бўлган. Айни пайтда у билан алоқада бўлган қарийб 200 киши ҳам изоляция қилинган.
Россиянинг Иркутск вилоятида ўлатга қарши институт ходимаси вафот этганидан сўнг бир қатор шифохоналарда карантин жорий қилинди. Бу ҳақда «Медуза» нашри ёзмоқда.
Маълумотларга кўра, 28 ёшли лаборант Дарья Шипилова 2 октябрга ўтар кечаси вафот этган. У Иркутскдаги Ўлатга қарши институтда ишлаган. Ходима 29 сентябрь куни Шелеховдаги шифохонага ётқизилган.
Вазият сабаб Шелеховдаги марказий шифохона карантинга ўтказилган. Айрим бўлимларда беморларни қабул қилиш ва чиқариш вақтинча чекланган.
«Роспотребнадзор» марҳумада келиб чиқиши номаълум пневмония бўлганини маълум қилган.
Айни пайтда 1-, 3- ва 10-сонли шаҳар клиник шифохоналари, туғруқхона ҳамда Ивано-Матренинск болалар клиник шифохонаси карантинга ёпилган. Бундан ташқари, Шелехов шаҳридаги Иркутск алюминий заводида (ИркАЗ) ниқоб тақиш режими жорий этилган.
Иркутск вилояти губернатори Игорь Кобзев 2 октябрь куни эпидемияга қарши комиссиянинг навбатдан ташқари йиғилишини ўтказган. Унда Россиянинг бош давлат санитария шифокори Анна Попова ҳам иштирок этган. Йиғилишга фуқаролардан бирида «ўта хавфли инфекция» аниқлангани эҳтимоли сабаб қилиб кўрсатилган.
Кобзевнинг сўзларига кўра, эпидемияга қарши барча зарур чоралар кўрилмоқда. Яқин алоқада бўлгани аниқланган барча шахслар эса тиббий кузатувга олинган.
Марҳума аёл билан алоқада бўлган 197 нафар шахс тиббий кузатувга олинган. Уларда ҳозирча касаллик белгилари аниқланмаган.
