АҚШ Давлат котиби Ўзбекистонга келади: ташрифдан кўзланган мақсад нима?
Марко Рубио 17–22 октябрь кунлари Самарқанд, Мумбай ва Жамнагар шаҳарларига ташриф буюради.
АҚШ Давлат котиби Марко Рубионинг Ўзбекистонга ташрифи дастурига оид янги тафсилотлар маълум бўлди. АҚШ Давлат департаменти матбуот котиби идораси хабарига кўра, сафар Вашингтоннинг Марказий Осиё мамлакатлари билан стратегик ҳамкорлигини мустаҳкамлаш, савдо ва инвестиция алоқаларини кенгайтиришга қаратилган.
Марко Рубио 17–22 октябрь кунлари Ўзбекистоннинг Самарқанд шаҳри, шунингдек, Ҳиндистоннинг Мумбай ва Жамнагар шаҳарларига боради.
Самарқандда АҚШ Давлат котиби С5+1 вазирлар учрашувида иштирок этади. Унда АҚШ ва Марказий Осиё мамлакатлари ўртасидаги стратегик ҳамкорликни ривожлантириш, минтақада тинчлик ва фаровонликни мустаҳкамлаш масалалари муҳокама қилинади.
Қолаверса, Рубио Марказий Осиёнинг бешта давлати — Ўзбекистон, Қозоғистон, Тожикистон, Туркманистон ва Қирғизистоннинг юқори лавозимли расмийлари билан икки томонлама учрашувлар ўтказади.
Ташриф доирасида АҚШ Давлат котиби 200 дан ортиқ бизнес етакчиларидан иборат Америка тижорат делегациясига ҳам раҳбарлик қилади. Сафардан кўзланган мақсадлардан бири АҚШ ва Марказий Осиё ўртасидаги савдо-иқтисодий алоқаларни кенгайтириш ҳамда янги тижорат ҳамкорликларини йўлга қўйишдир.
Ўзбекистондаги учрашувлардан сўнг Марко Рубио Ҳиндистонга йўл олади. У ерда ҳукумат вакиллари билан АҚШ-Ҳиндистон стратегик ҳамкорлиги, минтақавий ва глобал вазият ҳамда энергетика соҳасидаги ҳамкорликни кенгайтириш истиқболларини муҳокама қилади. Шунингдек, бизнес вакиллари билан инвестиция ва иқтисодий ҳамкорлик масалалари юзасидан учрашувлар ўтказади.
