“Можаронинг марказида Донбасс масаласи турибди” — Рубио

 

АҚШ Давлат котиби Марко Рубио Украинадаги можаронинг давом этишига сабаб бўлаётган асосий масалалардан бири Донбасс ҳудудининг Украина назоратидаги қисми бўйича келишмовчиликлар эканини билдирди. Бу ҳақда у Breitbart нашрига берган интервьюсида айтган.

 

Рубионинг сўзларига кўра, Украина Донбасснинг ўз назоратида қолган қисмини тарк этишни истамайди, чунки бу ҳудуд мудофаанинг муҳим чизиғи ҳисобланади.

 

“Украина: «Биз Донбасснинг қолган 11 фоизидан воз кеча олмаймиз, чунки бу бизнинг сўнгги мудофаа чизиғимиз», дейди. Демак, можаронинг марказида шу масала турибди. Бошқа кўплаб муаммолар ҳам бор, аммо охир-оқибат, урушни айнан шу масала белгиламоқда”, — деган Рубио.

 

Давлат котибининг таъкидлашича, томонлар ўртасидаги келишмовчиликлар тинчлик музокараларини мураккаблаштирмоқда. Унинг фикрича, урушни тугатиш бўйича саъй-ҳаракатлар олиб борилаётганига қарамай, асосий масалаларда муросага эришиш қийинлигича қолмоқда.

 

Рубио, шунингдек, Украинадаги сайловлар масаласига ҳам тўхталган. Унинг айтишича, сайловлар муҳим бўлсада, улар урушнинг давом этишига сабаб бўлаётган асосий муаммоларни ҳал қилмайди.

 

Маълумот учун, Украинада 2022 йил февралида бошланган кенг кўламли уруш сабабли ҳарбий ҳолат жорий этилган. Украина қонунчилигига кўра, ҳарбий ҳолат даврида президент ва парламент сайловларини ўтказиш тақиқланган. Шу сабабли 2024 йилда ўтказилиши режалаштирилган президент сайлови ҳам бўлиб ўтмаган.