“Бундан ҳам кучли зарбалар оласиз” — Нетаняху
Исроил Бош вазири мамлакат душманларига янада кучли зарбалар берилиши мумкинлигини билдирди.
Бенямин Нетаняху мамлакат ҳарбий-ҳаво кучлари базаларидан бирига ташриф буюриб, Исроил душманларига қарши янада кучли зарбалар берилиши мумкинлигини билдирди. Бу ҳақда бош вазир девони эълон қилган видеода маълум қилинди.
Нетаняху база қўмондони билан суҳбатлашганини ва ҳарбийларнинг тайёргарлиги, қатъияти ҳамда зарур бўлганда душманларга зарба бериш қобилиятидан таассурот олганини айтган.
“Душманларимизга айтаман: бизни синаб кўрманг. Сиз ҳозиргача олган зарбаларингиздан ҳам кучлироқ зарбаларга дуч келасиз”, — деган у.
Бош вазир, шунингдек, Исроил ҳарбий-ҳаво кучлари учувчилари, ер усти экипажлари, Исроил мудофаа армияси (IDF) ва ҳукумат фаолияти натижасида мамлакат катта ютуқларга эришганини таъкидлаган.
Аввалроқ Нетаняху Исроил 27 октябрга белгиланган парламент сайловлари арафасида рақибларининг ҳужумларига дуч келиши мумкинлигини айтган эди. Шунингдек, у мамлакатнинг янгиланган миллий хавфсизлик концепциясини тақдим этиб, эҳтимолий таҳдидларга қарши олдиндан зарба бериш муҳимлигини таъкидлаган.
