Истанбулдаги сув тошқинлари: саккиз киши ҳалок бўлди
Расмийларга табиий офат етказган моддий зарар юзасидан қарийб 20 мингта мурожаат келиб тушган.
Ўтган ҳафта Истанбул ва унинг атрофида юз берган сув тошқинлари оқибатида ҳалок бўлганлар сони душанба куни саккиз кишига етди.
Қутқарувчилар Туркиянинг энг йирик шаҳри сўнгги 80 йилдан ортиқ вақт ичидаги энг кучли жала ёмғирларидан жабр кўрганидан сўнг яна бир неча кишининг жасадини топди.
Истанбул губернатори Давут Гул журналистларга берган маълумотига кўра, шаҳарда олти киши ҳалок бўлган. Қўшни вилоятда ҳалок бўлган яна икки кишининг жасади мегаполиснинг жануби-шарқий чеккасига оқим орқали олиб келган.
Расмийлар маълум қилишича, 14 октябрь, чоршанба куни кузатилган тарихий даражадаги жала 1942 йилда кузатувлар бошланганидан буён энг кучлиси бўлган. Кучли ёғингарчилик тартибсизликлар ва тўсатдан юз берган сув тошқинларига сабаб бўлган.
Губернаторнинг айтишича, пайшанба ҳолатига кўра, уч киши ҳалок бўлган, яна беш киши бедарак йўқолган деб ҳисобланган.
Ҳалок бўлганлар орасида кўлмакка қадам қўйиши оқибатида электр токи урган 14 ёшли бола ҳам бор. Жума куни Олтин Шох қўлтиғи қуйилиш жойидан тўртинчи жасад топилган, якшанба куни эса бешинчи жасад аниқланган. Ҳар иккиси ҳам эркак кишига тегишли бўлган.
Душанба куни Давут Гул матбуот хизмати Олтин Шох қўлтиғидаги Айвансарай паром бекати яқинидан яна бир эркакнинг жасади топилганини маълум қилди. У аввалроқ бедарак йўқолган деб эълон қилинган эди.
“Истанбулда жами олти киши ҳалок бўлди, яна бир киши бедарак йўқолган деб ҳисобланмоқда”, — деди Гул журналистларга.
Унинг қўшимча қилишича, Истанбулдан ташқарида, қўшни Кожаэли вилоятида яна икки киши ҳалок бўлган.
“Кожаэлида ҳалок бўлган ва оқим олиб кетиб, Пендиккача етиб келган икки кишининг жасади қидирув-қутқарув гуруҳларимиз томонидан топилди. Шу тариқа, жами саккиз кишининг жасади аниқланди”, — деди губернатор.
Унинг сўзларига кўра, бедарак йўқолган яна бир кишини қидириш ишлари давом этмоқда.
Гулнинг таъкидлашича, кучли ёмғир ва у билан боғлиқ сув тошқинлари оқибатида етказилган моддий зарар юзасидан ҳозиргача расмийларга қарийб 20 мингта мурожаат келиб тушган.
