Саудия Арабистонида вертолёт қулади: икки экипаж аъзоси ҳалок бўлди
Расмийлар бунга техник носозлик сабаб бўлганини билдирган, Ямандаги ҳусийлар эса вертолёт ракета билан уриб туширилганини даъво қилмоқда.
Саудия Арабистонининг Нажран вилоятида AH-6i русумли разведка вертолёти қулаб тушди. Ҳодиса оқибатида икки нафар экипаж аъзоси ҳалок бўлди. Бу ҳақда Саудия Арабистони бошчилигидаги коалиция вакили Турки ал-Маликий маълум қилди.
Баёнотга кўра, вертолёт Саудия Арабистони Миллий гвардия вазирлиги юрисдикциясидаги ҳудудда техник носозлик сабаб қулаган.
Бироқ Ямандаги ҳусийлар вертолёт ракета билан уриб туширилганини даъво қилди. Гуруҳ якшанба куни Саудия Арабистонининг AH-6i вертолётига Нажран яқинида ҳужум қилингани акс этган видеони эълон қилди. Reuters агентлиги видеодаги ҳолатни мустақил равишда тасдиқлай олмаган. Саудия Арабистони расмийлари ҳусийларнинг даъвосига ҳозирча изоҳ бермаган.
Ҳусийларнинг ҳарбий вакили Яҳё Сарий шанба куни ҳам Нажран яқинида Саудия Арабистонининг Apache вертолёти уриб туширилганини билдирган эди. Бу баёнот айни ҳодисага тегишли ёки йўқлиги номаълум.
Коалиция вакили Турки ал-Маликий эса ҳусийларнинг даъвосига жавобан Apache вертолётлари суратини эълон қилиб, улардан бири тез орада жанг майдонига қайтишини таъкидлади.
Сўнгги ҳафталарда Нажранда Эрон билан иттифоқчи бўлган ҳусийларнинг ҳужумлари кучайган. Саудия Арабистони бошчилигидаги коалиция ва ҳусийлар ўртасидаги тўқнашувлар Ямандаги можаронинг янада кескинлашишига сабаб бўлмоқда.
