Путин музокараларга рози бўлди: Россия, Украина ва АҚШ учрашуви кутилмоқда
Кремль музокаралар 10 ноябрь ёки ундан кейин Абу-Дабида ўтказилиши мумкинлигини маълум қилди.
Россия президенти Владимир Путин АҚШ воситачилигида Украина билан уч томонлама тинчлик музокараларини келаси ой қайта бошлашга розилик билдирди. Кремль маълумотига кўра, музокаралар Абу-Дабида 10 ноябрь ёки ундан кейин бошланиши мумкин. Бу ҳақда Reuters хабар берди.
Бу келишув Путин ва АҚШ махсус вакили Стив Уиткоффнинг Санкт-Петербургда қарийб уч соат давом этган учрашувида муҳокама қилинган. Учрашув Уиткоффнинг Россия президенти билан юзма-юз тўққизинчи мулоқоти бўлди. Музокараларда Россия президентининг махсус инвестиция вакили Кирилл Дмитриев ҳам қатнашди.
Кремлга кўра, бўлажак музокараларда уруш якунланганидан кейин Россия ва Украина хавфсизлигини кафолатлаш масалалари кўриб чиқилади. Бироқ Москва Уиткоффнинг бир кун аввал Ослода Украина президенти Володимир Зеленский, Финляндия ва Норвегия етакчилари, шунингдек, Европа давлатлари ва НАТО вакиллари билан ўтказган учрашуви натижаларидан тўлиқ мамнун эмаслигини билдирди.
Кремль ёрдамчиси Юрий Ушаковнинг айтишича, Уиткофф Осло музокараларида муайян силжиш кузатилганини қайд этган, АҚШ расмийси эса Украина янги таклифларни илгари сурганини билдирган.
Учрашувда Россия ва АҚШ ўртасидаги қўшма иқтисодий лойиҳалар, жумладан, амалга оширилиш арафасида турган ташаббуслар муҳокама қилинган.
Уиткофф Путин кўриб чиқиши учун эҳтимолий тинчлик келишувига оид ҳужжатларни олиб келган. Трампнинг куёви Жаред Кушнер ҳам музокарага телефон орқали қўшилиб, ўз таклифларини етказган. Путин, шунингдек, Эрон билан боғлиқ масалаларни ҳал қилишда Трампга ёрдам беришни ва АҚШга катта миқдорда минерал ўғит етказиб беришни таклиф қилган.
Бундан ташқари, келаси ой Хитойда Путин, Трамп ва Хитой президенти Си Цзиньпин иштирокида уч томонлама учрашув ўтказиш имконияти ҳам муҳокама қилинган. Кремль маълумотига кўра, Пекин бундай учрашувга тайёргарлик кўрмоқда.
Reuters қайд этишича, Россия ва Украина эҳтимолий тинчлик келишувининг шартлари борасида ҳамон кескин фарқли позицияларда турибди. Путиннинг асосий талаблари орасида Донецк вилоятини тўлиқ Россия назоратига ўтказиш ва Украинанинг НАТОга аъзо бўлмаслиги бор. Москва вақтинчалик ўт очишни тўхтатишдан кўра, кенг қамровли тинчлик келишувини маъқул кўради.
Шу билан бирга, Трамп Киевга урушни тугатиш бўйича келишувга эришиш юзасидан босимни кучайтирмоқда. Зеленский эса урушни тугатишнинг асосий масалаларини Путин ва Трамп билан уч томонлама учрашувда муҳокама қилишга умид билдирган.
Вашингтон ва Киев ўртасидаги муносабатлар АҚШнинг Россия билан дизель ёқилғиси экспорти бўйича келишувни эълон қилганидан сўнг ёмонлашгани хабар қилинган. Украина, шунингдек, айрим разведка маълумотлари алмашинуви ва Starshield сунъий йўлдош тизимидан фойдаланишда узилишлар юз берганидан шикоят қилган. Зеленский Ослодаги учрашувда бу муаммоларни ҳал қилиш бўйича келишувга эришилганини айтган.
The Wall Street Journal нашри АҚШ расмийлари ва вазиятдан хабардор манбаларга таяниб, Илон Маск ўтган ҳафта Украинага Россиянинг баллистик ракета ҳужумларини кузатишда ёрдам берадиган Starlink тизимининг ҳарбий даражадаги версияси ишини секинлаштиришни буюргани ҳақида хабар берган. Reuters бу маълумотни мустақил равишда тасдиқлай олмаган.
Маск бундай қарорлар АҚШ ҳарбийлари ёки президенти томонидан қабул қилинишини билдирган. Трамп эса бунга алоқаси йўқлигини айтган. АҚШ давлат котиби Марко Рубио ҳам Вашингтон Киевнинг Starlink тизимидан фойдаланиш имкониятларини чекламаганини таъкидлаган.
