Нетаняху Эронга зарбаларни қайта бошламоқчи — FТ
АҚШ эса сайловларгача кескин чоралар кўришни истамаяпти.
Исроил бош вазири Бенямин Нетаняху АҚШ билан музокараларда Эронга қарши кенг кўламли ҳарбий ҳаракатларни қайта бошлашни талаб қилмоқда. Бу ҳақда The Financial Times нашри вазиятдан хабардор манбаларга таяниб хабар берди.
Нашр маълумотларига кўра, Исроил ҳарбийлари октябрь ойи бошида Эронга қарши интенсив операциялар ўтказиш режасини тайёрлаган. Ҳужумларни 10 октябрда бошлаш ва бир неча кун давом эттириш кўзда тутилган. Нишонлар қаторига электр станциялари каби фуқаролик инфратузилмаси объектлари ҳамда ядровий иншоотлар киритилган.
Бироқ АҚШ президенти Дональд Трампнинг позицияси сабабли режалар кейинга қолдирилган. Трамп Исроил томонига Вашингтон АҚШ Конгрессига оралиқ сайловлар якунлангунига қадар кескин чоралар кўришни истамаслигини билдирган.
FТ манбалари ҳарбий ҳаракатларни қайта бошлаш ҳақидаги баёнотлар Теҳронга ён бериш учун босим ўтказишга қаратилган тактика бўлиши ҳам мумкинлигини қайд этмоқда.
Аввалроқ Ахios нашри ҳам ўз манбаларига таяниб, Трамп ва Нетаняху АҚШ ҳамда Исроилдаги сайловлардан олдин Эронга қарши янги кенг кўламли операция ўтказиш имкониятини муҳокама қилгани ҳақида хабар берган эди.
АҚШда Конгрессга оралиқ сайловлар 3 ноябрь куни бўлиб ўтади. Сайловларда Вакиллар палатасидаги барча ўринлар ва Сенатдаги айрим ўринлар учун кураш кечади.
