Афғонистоннинг собиқ президенти Ҳамид Карзай мамлакатдаги вазият юзасидан фикрларини билдирди. Бу ҳақда “Спутник Афганистан” хабар берди.
ИШИДнинг Кобул, Қундуз ва Қандаҳорда содир этган сўнгги терактлари ҳақида гапирар экан, Карзай Афғонистон мустаҳкам тинчлик, хавфсизлик ва барқарорликка эришиши учун катта йўлни босиши зарурлигини маълум қилган. Унинг фикрича, Афғонистонга ИШИД хориждан олиб кирилган, маданият, тарих ва дин билан умуман боғлиқ бўлмаган ҳодиса ҳисобланиб, у афғон халқига мутлақ бегона.
Собиқ президент афғон инқирозини ҳал этиш йўллари ҳақида ҳам гапириб ўтган. Унинг фикрича, мавжуд муаммоларни халқнинг сиёсий ҳаётда кенг иштирокини таъминлаш орқали ҳал этиш мумкин.
Шунингдек, у қўшни давлатлар ва жаҳон давлатларини афғон халқига ёрдам беришга чақирди. Карзай айниқса, ушбу вазиятда Эроннинг роли катта бўлиши мумкинлигини таъкидлаган.
Аввалроқ Қатар эндиликда Афғонистонда АҚШ манфаатларини илгари суриши ҳамда Кобул аэропортида юзлаб афғонлар қолиб кетгани ҳақида хабар берилганди.
Жаҳонгир Қўзиев