Андижон давлат тиббиёт институтининг 3 нафар талабаси ЙТҲ оқибатида вафот этди
Маълумотларга қараганда, Андижон вилоятининг Андижон туманида автоҳалокатга учраган “Tracker”да 3 нафар талаба йигит вафот этди. Яна 1 киши тан жароҳати билан шифохонага ётқизилган.
Бош прокуратура ахборот хизмати раҳбари Ҳаёт Шамсутдиновнинг маълум қилишича, жорий йилнинг 21 сентябрь куни соат 02:30 ларда 21 ёшли ҳайдовчи А.А. бошқа шахсга тегишли бўлган “Tracker” машинасини Андижон тумани “Жаҳонобод” МФЙ ҳудудида бошқариб бораётган пайтда бошқарувни йўқотиб, бетон тўсиққа урилган. Оқибатда, ҳайдовчи ҳодиса жойида вафот этган.
Автомашина салонида бўлган 21 ёшли А.П., 20 ёшли А.Ю. ва унинг тенгдоши И.А. турли тан жароҳатлари билан шифохонага ётқизилган. Шифокорлар томонидан кўрсатилган тиббий муолажаларга қарамай, А.Ю. ва И.А. шифохонада вафот этган.
Автоҳалокат оқибатида вафот этган йигитларнинг барчаси Андижон тиббиёт институтининг 3-курс талабалари бўлган.
Ҳозирда ушбу ҳолат юзасидан Андижон туман ИИБ ТБ томонидан тергов ҳаракатлари олиб борилмоқда. Шунингдек, Андижон вилоят прокуратураси томонидан назорат ўрнатилган.
Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Эслатиб ўтамиз, аввалроқ Сурхондарёда “Matiz” ҳайдовчиси 12 ёшли қизни уриб юборгани ҳамда “Халқ сўзи” газетаси журналисти ЙТҲга учраб, вафот этгани ҳақида хабар берилганди.
Чўлпоной Аҳмедова
