АҚШ Давлат департаменти 75 мамлакат фуқаролари учун иммиграцион визаларни расмийлаштиришни тўхтатмоқда. Бу ҳақда Fox News телеканали хабар берди.
Маълум қилинишича, мазкур қарор ариза берувчилар устидан назоратни кучайтириш ва иммиграция жараёнларини қайта кўриб чиқиш доирасида қабул қилинган. Янги тартиб 21 январдан кучга киради ва Давлат департаменти виза бериш механизмларини тўлиқ қайта кўриб чиқмагунча муддатсиз амал қилади.
Fox News маълумотига кўра, чекловлар қўлланиладиган давлатлар рўйхатига Россия, Афғонистон, Бразилия, Миср, Эрон, Ироқ, Яман, Нигерия, Сомали ва Таиланд кирган. Шунингдек, Марказий Осиёдан Ўзбекистон, Қозоғистон ва Қирғизистон ҳам ушбу рўйхатдан жой олган.
АҚШ Давлат департаменти вакили Томми Пигготтнинг таъкидлашича, мазкур чоралар ижтимоий таъминот ва давлат нафақаларидан фойдаланиши мумкин бўлган хорижий фуқароларнинг мамлакатга киришини чеклашга қаратилган. Шу сабабли иммиграция тартиб-қоидалари қайта кўриб чиқилаётган даврда визалар берилиши вақтинча тўхтатилади.
Эслатиб ўтамиз, 2025 йил декабрь ойи охирида АҚШнинг Ўзбекистондаги элчихонаси “Diversity Visa” (яшил карта) дастури доирасида визалар берилиши тўхтатилганини эълон қилган эди. Давлат департаменти мазкур дастур бўйича суҳбатлар ўтказилишини давом эттирган бўлсада, иммиграцион визалар берилиши вақтинча тўхтатилган.