АҚШ Давлат департаменти Darkside хакерлар гуруҳини қўлга олишга имкон берувчи маълумотлар учун 10 миллион доллар мукофот берилишини эълон қилди. Бу ҳақда ТАСС хабар берди.
Давлат департаменти тарқатган пресс-релизга кўра, ушбу хакерлар гуруҳи Американинг Colonial Pipeline компаниясига уюштирилган киберҳужум ортида турган. Шунингдек, хакерларни қўлга олишда бевосита ёрдам берган шахсларга қўшимча 5 миллион доллар мукофот ваъда қилинган.
DarkSide хакерлар гуруҳи Colonial Pipeline компаниясига ҳужум қилиши оқибатида АҚШ шарқида 5 кун давомида барча нефть қувурлари ишдан чиққанди. Ўшанда президент Жозеф Байден мамлакатда фавқулодда ҳолат жорий этган. Америка разведкаси хакерлар гуруҳи Россия ёки Шарқий Европада жойлашган, деган тахминни илгари сурган.
Аввалроқ АҚШ ва Россия киберхавфсизлик бўйича музокаралар олиб боргани хабар қилинганди.