Ёзнинг энг қиммат трансфери амалга ошди. Мадриднинг "Атлетико" клуби “Манчестер Сити”дан ҳужумчи Жулиан Алварес трансферини эълон қилди. Инсайдерларнинг фикрича, трансфер суммаси 75 миллион евро + бонуслар сифатида 20 миллион еврони ташкил қилган. Бу тарихий трансфер: “Манчестер Сити” ўз тарихида ҳеч қачон бундай суммага футболчи сотмаган эди. Биз Алвареснинг Мадридга саёҳати хронологияси ҳақида маълумот тақдим этамиз.
Ўтган мавсумда Жулиан “Манчестер Сити” сафида барча турнирларда 54 та ўйин ўтказиб, 19 та гол урди ва 13 та голли узатмани амалга оширди. Бу яхши натижа, лекин аргентиналикнинг имкониятлари бундан ҳам юқорироқ эди. Шундай бўлсада, "Сити"да у Эрлинг Ҳоланддан кейинги ўринбосар сифатида қабул қилинмади. 24 ёшида Жаҳон кубоги, Америка кубоги, Чемпионлар лигаси, Либертадорес кубоги ва икки марта Премьер-лига чемпионлигини қўлга киритган футболчи яна кўп мақсадларни олдига қўйган. Бу ҳақда июль ойида Алвареснинг ўзи маълум қилганди.
"Ўтган мавсумда мен "Сити" сафида энг кўп ўйнаган футболчилардан бири эдим. Лекин, якунда муҳим ўйинларда четда қолишни ёқтирмайман, жамоани ғалабасига ўз ҳиссамни қўшишни хоҳлайман. Мен ўзим учун нимани хоҳлаётганим ҳақида ўйлаб кўришим керак".
Хабарларда айтилишича, 24 ёшли ҳужумчи "Сити" раҳбариятидан уни қўйиб юборишни сўраган. 2023/2024 йилги мавсум охирида Алварес клуб билан шартномасини узайтиришдан бош тортганди. "Манчестер Сити" бош мураббийи Пеп Гвардиола футболчининг сўзларига жавоб қайтариб, унинг жамоадан кетиши мумкинлиги ҳақидаги маълумотларга изоҳ берди.
"Алварес бу ҳақда ўйлаб кўришини айтди. У ўйланиб бўлгач, агенти “Манчестер Сити” спорт директорига қўнғироқ қилади ва натижада биз нима бўлишини кўрамиз. Биламан, у муҳим баҳсларда ўйнашни хоҳлайди, лекин бошқаларда ҳам вазият шундай. Муҳим учрашувларда майдонга тушишни истайдиган 18 ёки 19 нафар футболчим бор. Агар у кўпроқ нарсани хоҳласа, бу яхши."
"Марса" нашрининг хабар беришича, "Атлетико" Алваресни Антуан Гризманнинг ўринбосари деб ҳисобламоқда. Мадридликлар аргентиналикни кўп гол ура оладиган ва майдонда етакчи бўлишга қодир футболчи сифатида кўрмоқда. "Атлетико" шунингдек, Килиан Мбаппенинг "Реал Мадрид"га ўтиши ва "Барселона"нинг Нико Уилямс ва Дани Олмо билан тузган катта шартномаларига шу орқали жавоб бермоқчи.