Миришкорда банк ходимлари аралашган ноқонуний "ўйин" фош этилди
Миришкор туманида Халқ банки ходими ресурс йўқ деб, фуқаролардан бирининг кредит учун тайёрланган ҳужжатларидан фойдаланди.
Қашқадарё ИИБ маълумотига кўра, 2021 йил 19 август куни Миришкор тумани «Миробод» маҳалласида яшовчи фуқаро Х.Ж. ИИБга ариза билан шикоят қилган.
У ўз аризасида 2019 йил 26 июнь куни Халқ банкининг Миришкор филиали ходими И.Ш.га кредит олиш масаласи бўйича мурожаат қилгани, унга кредит бериш учун ресурс йўқлигини билдирган бўлса-да, лекин И.Ш унинг номидан кредит олиши учун банк бошлиғи номига ёзилган ариза ва кредит олишга асос бўладиган барча ҳужжатларни расмийлаштириб, фирибгарлик йўли билан 17 млн сўм кредит олганини маълум қилган. Ва маблағни ўзининг эҳтиёжи учун ишлатиб юборган.
Мазкур ҳолат юзасидан туман ИИБ ТБ томонидан И.Ш.га нисбатан Ўзбекистон Республикаси Жиноят кодексининг 168-моддаси 1-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Эслатиб ўтамиз, аввалроқ Қашқадарёда банк ходимлари мижозлар томонидан калтаклангани ҳамда Шаҳрисабзда банкоматларнинг ишламаётгани ҳақида хабар берилганди.
