Байден журналистлар жамоасига нутқини бошлаган пайтда Афғонистон ҳақида саволлар берилган. Хусусан, ундан толиблар ҳукмронлигини тан олиш масаласи сўралган.
“Бунгача ҳали анча бор”, — деб жавоб қайтарган президент.
Маълумот ўрнида: 15 август куни “Толибон” Кобул шаҳрини эгаллади. АҚШ ҳарбийлари 31 август куни Афғонистонни тўлиқ тарк этди. Бу мамлакатдаги АҚШнинг 20 йиллик ҳарбий иштирокига якун ясади.
“Толибон” 6 сентябрь куни бўйсундирилмаган сўнгги вилоят — Панжшерни ҳам ўз назоратига олди. Шундан кейин бутун Афғонистонда ҳокимият ушбу ҳаракат қўлига ўтди.
Ҳозиргача “Толибон” ҳукмронлигини ҳеч қайси давлат тан олмаган. Бунга БМТнинг толибларни террорчи ташкилотлар рўйхатидан чиқариб ташламагани сабаб қилиб кўрсатилмоқда. Шундай бўлса-да, айрим давлатлар ҳаракат билан ишчи алоқаларни ўрнатган. Шунингдек, “Толибон” билан мулоқот ўрнатиш муҳимлиги таъкидланган. Буюк Британия ва Германия бунинг тарафдори.
Эслатиб ўтамиз, аввалроқ Панжшер қаршилик кучлари етакчиси Аҳмад Масъуднинг мурожаатномаси ҳақида хабар берилганди.
Жаҳонгир Қўзиев