БМТнинг тавсиялари ҳаётга тадбиқ этилмоқда
Қонун лойиҳасида қатор қонун ҳужжатларига ўзгартиш ва қўшимчалар киритиш кўзда тутилмоқда.
2021 йил 15 июль куни Олий Мажлис Қонунчилик палатасининг Халқаро ишлар ва парламентлараро алоқалар қўмитаси томонидан Ўзбекистон Республикаси Президентининг “2017–2021-йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид Давлат дастурининг 270-банди Ўзбекистон Республикаси норматив-ҳуқуқий ҳужжатлари ва дастурий ҳужжатларида тизимли акс эттирилиши масалалари муҳокамасига бағишланган қўмита йиғилиши ўтказилди.
Йиғилиш давомида иштирокчилар томонидан БМТнинг вояга етмаганлар ўртасида жиноятчиликнинг олдини олиш учун бошқарув принциплари БМТ Бош Ассамблеясининг 1990 йил 14 декабрдаги 45/112-сонли Резолюцияси билан қабул қилинганлиги ва резолюцияда барча аъзо давлатлар жиноятчиликнинг олдини олиш бўйича дастурлар ишлаб чиқишда Ар-Риёд бошқарув принципларини миллий қонунчиликда, давлат сиёсати ва амалиётда қўллашга чақирилганлиги таъкидланди.
Шундан келиб чиқиб, миллий қонунчиликка БМТнинг вояга етмаганлар ўртасида ҳуқуқбузарликларнинг олдини олиш бўйича кўрсатмаларининг асосий қоидаларини киритиш орқали вояга етмаганлар ўртасида ҳуқуқбузарликлар профилактикаси механизмларини такомиллаштириш мақсадида Олий Мажлис Қонунчилик палатаси томонидан “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳаси ишлаб чиқилган.
