Боғча ошхонасида гўштни яширганлар кир ювувчиликка ўтказилади

 

 

Мазкур ҳолатга аниқлик киритиш мақсадида Андижон вилояти Мактабгача таълим бошқармаси матбуот хизмати раҳбари Абдуносир Воҳидов билан боғландик:

 

“Бу ҳолат жорий йилнинг 27 апрелида Aндижон вилояти Қўрғонтепа туманидаги 12-давлат мактабгача таълим ташкилотида эмас, балки 2-давлат мактабгача таълим ташкилотида бўлган. Видео ўша куни боғчанинг ёрдамчи ошпази Моҳларой Мамарасулова томонидан видеога олинган ва ижтимоий тармоққа жойланган. Шундан сўнг Моҳларойнинг онаси Фотима Сиддиқова Қўрғонтепа тумани Ички ишлар бўлимига ариза билан мурожаат қилган.

 

Aризага биноан, ушбу ҳолат Қўрғонтепа тумани Ички ишлар бўлими томонидан ўрганилиб, тўпланган ҳужжатлар Қўрғонтепа туман жиноят ишлари бўйича судига юборилган. 12 май куни жиноят ишлари бўйича Қўрғонтепа туман судида гуруҳларга овқат тарқатиладиган челакда суяк ва гўштларни олиб қўйган бош ошпаз Р.Отахоновага нисбатан жарима жазоси тайинланган.

 

 

Шунингдек, бош ошпаз Р.Отахонова ва ёрдамчи ошпаз Х.Ғофуровалар тегишли тартибда оилавий шароитлари, айбларига чин дилдан пушаймонлиги сабаб улар ошпазликдан кир ювувчиликка ўтказилган.

 

Овқатни вақтида бермаслик воқеаси М.Мамарасулова томонидан қўл телефонида тасвирга туширилган. Ушбу ҳолат жорий йилнинг 26 июль куни соат 11:30 да овқат пиширилгач, ҳамшира томонидан синама олинганда овқат тўлиқ пишиб етилмагани сабабли меъёрида пиширилиши талаб этилган. Видеода “5 нафар ошхона ишчисининг ўрнига 3 нафар ходим ишламоқда” деб айтилган.

 

Ўша куни ҳақиқатдан ҳам 3 нафар ошхона ишчиси ишлаган. Бунга сабаб, 1 нафар ошхона ишчиси карантинга олинган, 1 нафари эса ҳомиладор бўлгани сабабли соғлиги ёмонлашиб, шифокор кўригига (ошхонадаги қолган ишчилар билан келишиб) чиқиб кетган. Видеодаги жараёнлар бир кунда содир этилмаган. Улар монтаж асосида бирлаштирилган. Яъни видеода кўрсатилган сифатсиз “карам воқеаси” 2019 йилнинг март ойида видеога олинган.

 

Ушбу видео токи ижтимоий тармоқда тарқалгунча ҳеч кимга кўрсатилмагани сабабли чора кўрилмаган. Ушбу масалалар бўйича 2-давлат мактабгача таълим ташкилотида кузатув кенгашининг йиғилиши чақирилган. Кенгашда айбдор шахсларга нисбатан чора кўрилиши режалаштирилган.

 

Баҳринисо Мадумарова