Бухородаги бинолар қум бўронига дош беролмади

 

4 ноябрь куни Ўзбекистон бўйлаб эсган чангли шамол ва қум бўрони оқибатида Бухоро вилояти Пешку тумани ҳокимлиги биносининг томи учиб кетди.

Туман ҳокими Ваҳобжон Қаҳҳоровнинг хабар беришича,   шифт ҳокимлик биносидан 20 метрча наридаги йўл ёқасига бориб тушган.

 

Кеча тахминан соат  17:00 лар  атрофида ҳокимлик биносига ўз муаммоларини ҳал қилиш учун келаётган одамларнинг кўз ўнгида кучли қумбўрон  содир бўлди. Оқибатда, бинонинг  том қисмида ваҳимали кўчиш юзага келиб, учиб кетган.

 

Аниқланишича,  туман ҳокимлиги биноси олдидаги усти ёпиқ аҳоли дам олиш ўриндиқларига ҳам жиддий шикаст етган. Ёритгичлар синиб, бинога электр энергияси етказиб берувчи барча симлар яроқсиз ҳолга келган.

Бундан ташқари,  туман солиқ идораси биноси шифти ҳам қумбўронда қўпорилиб кўчиб тушган. Бир нечта аҳоли яшаш уйларининг шифтлари кўчган, кўнгилсиз оқибатлардан эҳтиётланиш учун қатор манзилларни электр энергиясидан узиб қўйишга тўғри келган.

 

Табиий офатдан хабар топган Фавқулодда вазиятлар бошқармаси бошлиғи ва сектор раҳбарлари зудлик билан етиб келган.

 

Маълумот ўрнида: мазкур биноларнинг шифтлари бундан 7-8 йил илгари сифатли қурилиш материалларидан мустаҳкам ўрнатилган. 2019 йилда Бухорода эсган кучли шамолга дош берган.

 

Шунингдек, 4 ноябрь куни тупроқнинг қуруқ устки қатламларини шамол кўтаргани туфайли Тошкент шаҳри ва бошқа вилоятларда чанг–қум аралаш туман юзага келди. Пойтахт ҳавосидаги чанг миқдори меъёрдан 5 баробар ошиб кетган.

 

Эслатиб ўтамиз, аввалроқ Ўзбекистонда чанг бўрони давом этаётгани  ҳақида хабар берилганди.

Чўлпоной Аҳмедова