Буюк Британия мигрантларни GPS орқали кузатмоқчи
Борис Жонсон бу лойиҳани маъқуллаган.
Буюк Британияда мигрантлар ҳаракати GPS (Global Positioning System) орқали кузатилади. Мамлакат ички ишлар вазирлиги бу бўйича пилот лойиҳани тайёрламоқда.
Унга кўра, махсус қурилма орқали мигрантлар билан доимий алоқа ўрнатилади. Бундан ташқари, миграцион марказлар тартибини бузган шахслар ҳақида маълумотлар тўплаб борилади.
Янги механизм орқали тартибни бузганларга кўчага чиқиш, алоҳида жойларга ташриф буюришни тақиқлаши, шунингдек, уларни қўлга олиш мумкин бўлади. Пилот лойиҳа иштирокчилари сони очиқланмаган.
Ушбу ҳаракатлар бош вазир Борис Жонсон томонидан қўллаб-қувватланган.
“Буюк Британия жуда меҳмондўст давлат, мен бу билан фахрланаман. Аммо бизнинг қонунларимизни бузиб, мамлакатимизга ноқонуний кириб келаётганларни аниқлаш муҳим. Бу бизнинг Руанда йўналишидаги сиёсатимизга ҳам мос келади”, – деган у.
Ўз навбатида Буюк Британия қочқинлар масаласи бўйича кенгаш ижрочи директори Анвар Соломон ушбу қарорни танқид қилди.
“Британия ҳукуматининг уруш, хунрезликлардан қочган одамлар билан жиноятчилардек муносабатда бўлиши даҳшатли”, – деб қайд этган у.
Аввалроқ Буюк Британияда Марказий Осиёлик ишчилар қулупнай етиштираётгани тўғрисида хабар берилганди.
