Албатта, бу кўпчиик учун қулай имконият яратади. Кимдир ундан ижобий мақсадларда фойдаланади, кимдир эса қаби мақсадларини амалга ошириради. Сўнгги вақтларда интернет сабаб гумроҳлик гирдобига тушганлар, хатолари касрига тинч оилалар ҳам пароканда бўлмоқда. Бугунги мавзуимиз айнан интерен орқали танишувлар оқибатида тузоққа илинганлар ҳақида.
Севара, Пискент тумани, 33 ёш:
-Турмушимдан ажрашганман. Онам билан яшайман. Ободонлаштириш бошқармасида кўча супурувчи бўлиб ишлайман. Интернетдан доимий фойдаланаман.Дўстларим билан мулоқотда бўламан. Кунларнинг бирида Инстаграммда Иброҳим исмли йигит билан танишиб қолдим. Уни ҳаётда кўрмаган бўлсамда, телефон орқали гаплашиб, ширин гапига, сохта муҳаббатига алданиб қолдим. У менга ўзини Андижондан эканлигини, уйланмаганини ва хозирги кунда ИИБ да фаолият юритишини айтди. Менга ҳаттоки ИИБ либосида тушган суратларини ҳам юборди. Бир ҳафта давомида туну- кун телефон орқали мулоқотда бўлдик. Кейин эса у кутилмаганда Пискентга олдимга келишини айтди. Мен унга келмаслигини, аксинча, ўзим Андижонга ўзим боришимни айтдим.
-Нега ўзингиз бормоқчи бўдингиз?
-Чунки мен биринчи турмушимдан ажрашганман. Агар маҳалламга келса ҳамма мен ҳақимда ёмон фикрга бориши мумкин эди.
-Бир ҳафта давомида телеграм орқали нималар хақида сухбатлашдингиз?
-У мени шаръий никоҳига олишини айтди, севиб қолганига ишонтирди.
-Шаръий никоҳга оламан деса боравердингизми?
-Қандай қилиб ишониб қолганимни ўзим ҳам билмайман.Меҳрга зор эдим, унинг сохта меҳри хақиқатдек туюлди. Мен эримдан жуда кўп азият чекканман. У билан бирга ободонлаштириш бўлимида ишлар эдик. Жуда кўп спиртли ичимлик истеъмол қилар эди. Мени бўлар -бўлмасга рашк қилиб доим урарди. Охирги марта рашк сабаб чиққан бўлган жанжалда 17 жойимдан пичоқлаган, ҳозир қамоқда. Чиқса мени албатта топади, шундан қўрқаман. Менга ҳимоячи керак эди. Реал ҳаётда Иброҳимни кўрмаган бўлсамда, севиб қолдим.
Биз унинг Жиззахдаги квартирасида кўришишга келишдик. Учрашдик ва икки кун йигит билан ўша уйда яшадик.Жанжал кейин бошланди. Иброҳим пул учун Жиззахга борганимни айтиб, менга туҳмат қилди. Сизларга мурожаат қилишдан мақсад ундан пул олмаганимни айтиб, ўзимни оқлаш.
-Сизга уйландими, ўртада яқин муносабат бўлдими?
Йўқ,менга уйланмади, лекин ўртада яқин муносабат бўлди.Икки кун ўтгач уйга акамлар келяпти, кет, менга керакмассан, деб уйдан ҳайдаб чиқарди. Кейин мен ҳам жанжал қилдим ва маҳалла профилактика инспекторларини чақирдим.
- Нега бирдан керакмассан деб сизни хайдаб чиқарди?
-Менга таклиф қилган нарсасини рад эттим. Кейин мени ўша нарсага мажбурламоқчи бўлди. Мен эса жанжал кўтардим. Орган ходими бизни идорага олиб кетди, йигит эса қочиб кетди.
-Нимага ишониб бу ишларга рози бўлдингиз, нега Жиззахга бордингиз? Сизга уйланаман деган экан, нега ота-онам билан гаплашинг демадингиз?Ўзингиздан ҳам хато ўзиздан ўтганини биласизми?
- Менга уйланишни айтиб ишонтирган эдида. Кейин билсам, менга айтган исми ҳам, ёши ҳам ёлғон экан. Лекин мен бунинг учун жаҳл қилмадим. Чунки ўзим ҳам унга ўзимни Мубина деб таништирдим, ёшимни 10 ёш кичик қилиб кўрсатдим.
Севара ўз кечинмаларини сўзлаб берар экан, мавжуд муаммо ва камчиликларнинг ечимини топишда амалий ёрдам сўради. Биз мурожаатчининг сўзини диққат билан тингладик, унга ёрдам беришдан аввал биз билмаган яна қандайдир хақиқатлар бормикин деган гумонда воқеа тафсилотини батафсил билиш мақсадида йигит билан боғландик.
Иброҳим:
-Мен уни чақирмаганман, ўз келди. Ҳамма нарсани ўзи бошлади. Мен хоҳласанг кел, хоҳламасанг келма дедим. Мен билан бир ҳафта олдин интернетда танишди, телефон рақамингизни беринг деб қўймади. Рақамимни берган эдим, бир хафта ичида менга ёпишиб олди, олдингизга бораман деб қулоқ- миямни еди. Яна бир нарсага эътибор қаратишингизни хоҳлардим, менга беҳаё суратлар юборди.
-Унга никохингизга олишингизни айтганмидингиз?
-Ҳеч қачон айтмаганман.
-Нима сабабдан Севара милицияга қўнғироқ қилиб устингиздан шикоят қилди?
-Кам пул берганим учун. Мени уни икки кунга пулга сотиб олганман. У меникида яшади, овқатланди, харажат қилдим, шунга умумий суммадан ушлаб қолдим. Алам қилиб жанжал кўтарди, пулни тўлиқ бермасанг устингдан зўрлади деб шикоят қиламан деди. Мен эса нима қилсан қил дедим. Пулни тўлиқ ололмагач ўзича таъзиримни бериб қўйиш мақсадида маҳалла нозирига телефон қилди. Агар ўзи рози бўлмаса мен уни мажбурламасдим. Бўйнидан арқон тортиб Жиззахдан судраб олиб келмаганман.
Иноят Қурбонова,маҳалла фаоли:
-Бу қиз бизда назоратда туради. Шу ҳолат бўлишига ҳам шароитни ўзи яратиб берган. Биз бу қизни жуда кўп бор тарбияга чақирдик. Уша куни шу йигитни устидан шикоят қилиб маҳаллага келиб жанжал кўтарди. Тасаввур қилинг, ўзи билмаган, танимаган мутлақо бегона одамни уйига борган, бу ақлга сиғмайди. Ҳаё, ибо, иффат қани? Аёл дегани ҳам шунақа бўладими? Сўрангчи, онаси ёки маҳалла кўйнинг дуосини олдими кетишдан олдин? Онасининг айтишича, уйдан ўртоғимникига кетдим деб чиқиб кетган.
Аёл қулоғи билан яхши кўради, деган гап бор. Аслида бу гапда жон бор. Биринчи тақдири яхши бўлмагандан сўнг албатта кимдандир меҳр кутади. Афсуски, Севара ҳам ўзи биламаган холда ширин гапга, соҳта меҳрга алданиб қолди. Энди эса афсуски хатоларини тушуниб кўз ёш тўкаяпти. Биз қайсидир маънода уни тушунамиз, қачонки инсон ўз хатоларини англаб етсагина ҳаёти яхши томонга ўзгаради. Шундай экан, бугуни воқеа бошқаларга ибрат бўлсин.
Йигитларга айтадиган гапимиз бор - хоҳ у жувон бўлсин, хоҳ қиз бола, уларни алдашдан олдин кўз олдингизга опа-сингиларингизни келтиринг, аёлларнинг тақдири билан ўйнашманг. Зеро, у ҳам бахтли бўлишга хақлидир.
Муножат Валиева