Фарғонада “Ислом давлати” террористик ташкилоти тарафдори қўлга олинди

 

Фарғона вилоятининг Учкўприк туманида яшовчи, 2003 йилда туғилган “У.М.” интернет тармоғи орқали ёт ғоялар таъсирига тушиб қолиши натижасида, Суриядаги “Ислом давлати” халқаро террористик ташкилоти аъзолари сафига қўшилиш мақсадида 2021 йилнинг апрель ойида Туркия давлатига боради. Бироқ у ердан Сурия ҳудудига ўта олмагач, сентябрь ойида доимий яшаш манзилига қайтиб келади.

 

Сўнгра Қўқон шаҳри ва Учкўприк туманида истиқомат қилувчи яқин алоқаларидан иборат яширин “жамоат” тузиб, улар орасида “Ислом давлати” террористик ташкилоти ғояларини тарғиб қила бошлайди.

 

Аниқланишича, мазкур шахс ўзининг уяли телефони орқали ижтимоий тармоқлардаги ақидапарастлик ғоялари билан йўғрилган аудио ва видео материалларни тинглаб, томоша қилиб, уларнинг таъсирида “жамоат” аъзолари орасида “жиҳод” ҳамда “шаҳид”ликка чорловчи аудиосуҳбатлар олиб боради.

 

Вазирлар Маҳкамаси ҳузуридаги Дин ишлари бўйича қўмитанинг экспертиза хулосасига кўра, “У.М.”нинг уяли телефони хотирасидаги маълумотлар ўзининг моҳияти ва мазмуни, уларда илгари сурилган ғоялар жиҳатидан Ўзбекистон Республикасида жамоат хавфсизлиги ва тартибига таҳдид солувчи материаллар сирасига кириб, ақидапарастлик ғоялари билан йўғрилган ҳисобланади.

 

Таъкидлаш лозимки, ушбу маълумотларни Ўзбекистон Республикасига олиб кириш, тайёрлаш ва тарқатиш тақиқланади.

 

Ҳозирда “У.М.” ва унинг алоқаларига нисбатан қўзғатилган жиноят иши доирасида тергов-суриштирув ҳаракатлари олиб борилмоқда.

 

P.S.: Билиб-билмай қилинган хато сабаб ёки диний илмни нотўғри тарғиб қилиш оқибатида гулдек умрлар хазонга айланмоқда. Йигит бўлиб, ота-онага ёрдам бериш, оила деб аталмиш муқаддас қўрғонга қанот бўлиб, элу-юртга хизмат қилиш ўрнига ёшликнинг ноёб даврларини панжара ортида ўтказиш нақадар азоб. Тўғри йўлдан адашмаслик, умрни саробга айлантирмаслик эса ҳар кимнинг ўз қўлида.