Миллиардер Илон Маск 27 октябрь куни Twitter компаниясини сотиб олганидан кейин директорлар кенгашини тарқатиб юборди. Бу ҳақда душанба куни АҚШ Қимматли қоғозлар ва биржалар комиссияси (SEC) маълумотлари асосида эълон қилинган ҳужжатларда маълум қилинган.
«27 октябрдаги қўшилиш келишуви натижасида жаноб Маск Twitter'нинг ягона директори бўлди. Битим якунлангач, қўшилиш тўғрисидаги шартнома талабларига кўра, шу пайтгача директор бўлган шахслар ўз фаолиятини тўхтатдилар», - дейилади ҳужжатда.
Ижтимоий тармоқ асосчиларидан бири Джек Дорси компаниянинг 2,4 фоиз улушини сақлаб қолди. Ҳозирда унинг умумий бозор қиймати қарийб 1 миллиард долларни ташкил этувчи 18 миллиондан ортиқ акциялари мавжуд.
Маълумот ўрнида, Маск аввалроқ Twitter'ни сотиб олганидан сўнг компания раҳбариятининг бир неча аъзоларини, жумладан, бош директор Парага Агравал ва молия директори Нед Сегални ишдан бўшатгани хабар қилинганди.