ФИФА кунлари доирасида бир қатор ўртоқлик учрашувларида майдонга тушаётган Ўзбекистон миллий терма жамоаси бугун Тошкент вақти билан 05:00 да мексикалик футболчиларга қарши баҳс олиб борди.
Қизиқарли вазиятларга бой бўлган ўйинда жамоалар жангавор дурангга имзо чекишди. Учрашувда дастлаб Бобур Абдуҳолиқов жамоамизни ҳисобда олдинга олиб чиқди. Бироқ, голдан уч дақиқа ўтиб шимолий америкаликлар ҳисобни тенглаштирди. Термамиз биринчи бўлим якунида Азизбек Турғунбоев томонидан киритилган тўп эвазига яна рақибларини ортда қолдиришга муваффақ бўлишди. Мексика термаси томонидан 81 ва 88-дақиқаларда киритилган тўплардан сўнг футболчиларимизнинг мағлубияти тобора ойдинлашиб улгурганди. Бироқ, 92-дақиқада Отабек Шукуров томонидан урилган гол жамоамизни мағлубиятдан қутқариб қолди.
Учрашувда сўнг терма жамоамиз футболчилари 2026 йили Мексика, АҚШ ва Канадада бўлиб ўтадиган жаҳон чемпионатида кўришгунча дея барчага миннатдорчилик билдирди.