Жиззахда 6 ёшли болани асфальт ётқизиш машинаси босиб кетди
Жиззах вилояти Пахтакор туманида “Каток” русумли махсус техника машинасида вояга етмаган 2016 йил туғилган Т.Ш. асфальт ётқизиш машинаси остида қолиб кетди. Бу ҳақда вилоят Йўл ҳаракати хавфсизлиги бошқармаси ахборот хизмати раҳбари Эркин Очилов Zamon.uz'га хабар қилди.
Маълум бўлишича, T.Ш. велосипеди билан маҳалла ҳудудида айланиб юрган вa шу ҳудудда иш жараёнини ўтказаётган асфальт ётқизиш машинаси орқа томонига яқинлашиб келиб қолган. Ҳайдовчи орқага қараб ҳаракатланган пайтида бола машина билан тўқнашиб, йиқилган. Бунинг оқибатида у техника тагида қолиб кетиб, воқеа жойида ҳалок бўлган.
Ушбу воқеага ҳайдовчининг бепарволиги, иш вақтида хавфсизлик қоидаларига риоя қилинмагани, ҳайдовчи олдида уни огоҳлантириб туриши, керак бўлган ёрдамчи ишчиларнинг йўқлиги сабаб бўлган.
Мазкур ҳолат юзасидан оғир техника воситаси тегишли бўлган фирма раҳбари T.X.гa ёш бола билан боғлиқ бўлган йўл транспорт ҳодисаси юзасидан ҳаракат хавфсизлиги таъминланмагани вa махсус йўл белгиси қўйилмагани учун Маъмурий жавобгарлик тўғрисидаги кодекснинг 147-моддаси билан маъмурий баённома тузилган.
Эслатиб ўтамиз, аввалроқ Сариосиёда 4 ёшли бола ЙТҲ қурбони бўлганди. Шунингдек, Андижонда вояга етмаган бола бошқарувидаги автомобиль иштирокида ЙТҲ содир бўлгани, оқибатда ҳайдовчининг 13 ёшли укаси вафот этгани ҳақида хабар берилганди.
Муножат Валиева
