Бош прокуратура ҳузуридаги Департаментнинг Жиззах вилоят бошқармаси томонидан ўтказилган тезкор тадбирда, фуқаро Р.Ф. пандемия шароитида аҳолининг истеъмол талаби юқори бўлган дори воситаларини қиммат нархга сотаётган вақтда қўлган олинган.
Р.Ф. дори воситаларини сотиш орқали даромад орттиришни кўзлаб, фуқаро Х.га хорижда ишлаб чиқарилган, тегишли ҳужжатлари бўлмаган 206 дона “Remdesivir” дори воситасининг ҳар бир қутисини 680 минг сўмдан ҳисоблаб, жами 140 миллион сўмга сотмоқчи бўлган. Фуқародан умумий баҳоси 179,3 миллион сўмлик дори воситалари ашёвий далил сифатида олинган.
Мазкур ҳолат юзасидан Жиноят кодексининг 186-3-моддаси (дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, аввалроқ Оҳангаронда ва Зангиотада талаби юқори бўлган дори воситаларини сотаётган шахслар қўлган олингани ҳақида хабар берилганди.
Баҳринисо Мадумарова