Жиззахда талаба ноқонуний равишда 26 млн сўмга «Ремдесивир» дорисини сотишга уринди
Жиззахда сифат сертификатига эга бўлмаган дори воситаларини сотишга уринган талаба қўлга олинди. Бу ҳақда «Ёшлар» телеканалининг «Янги давр» кўрсатувида маълум қилинди.
20 август куни Бош прокуратура ҳузуридаги Иқтисодий жиноятларга қарши курашиш департаменти Жиззах вилояти бошқармаси томонидан тезкор тадбир ўтказилган. Тадбир давомида Қарши шаҳрида яшовчи 19 ёшли фуқаро Республика шошилинч тиббий ёрдам илмий маркази Жиззах филиали атрофида фуқаролардан бирига пандемия даврида талаб юқори бўлган дори воситаларини ноқонуний сотишга урингани аниқланган.
У 40 қути «Ремдесивир» дори воситасининг ҳар бирини 650 минг сўмдан ҳисоблаб, 26 миллион сўмга, шунингдек, 5 дона қутида «Триметабол» дори воситасини 130 сўмдан ҳисоблаб, 650 минг сўмга сотган вақтида ушланган.
Маълум бўлишича, Тошкент педиатрия тиббиёт институтининг 1-босқич талабаси бўлган ушбу йигит мижоз билан интернет орқали танишган. Ҳозирда ҳолат юзасидан терговга қадар текширув ҳаракатлари олиб борилмоқда.
Аввалроқ, Самарқандда пандемия даврида талаб юқори бўлган «Ремдесивир» дорисини ноқонуний сотаётган шахслар ушлангани тўғрисида хабар берилганди.
