Украина ҳудудида жойлашган АЭСлар хавфсизлигини таъминланиши шарт. Бу ҳақда Буюк Британия бош вазири Борис Жонсон маълум қилди.
"Фикримча, ушбу электр станцияларини ҳимоя қилиш учун қандайдир ҳимоя тизими бўлиши ўта муҳим. Бу тизим халқаро тузилмалар, хусусан, БМТ ва Халқаро Атом энергетикаси агентлигининг радиация даражасини кузатиб бориши учун ёрдам берган бўларди", — деган сиёсатчи.
У Чернобиль АЭС фожиаси қайтарилишидан хавотирда эканини қайд этган. Жонсон Украина ҳудудида бошқа АЭСлар ва ядро чиқиндилари кўмилган жойлар борлигини эслатди.
"Кремлга Украинадаги фуқаролик объектларида ядро ҳалокати юз бериши Россия ва бошқалар учун ҳам хавли эканини уқтириш керак", — деб таъкидлаган бош вазир.
Маълумот ўрнида: 4 март куни Запорожье АЭСида ёнғин келиб чиқди. Москва ва Киев ҳодисада бир-бирини айблаган.
Эслатиб ўтамиз, аввалроқ Путин Зеленский билан музокара ўтказмаслиги маълум қилинганди.