Жозеф Байден Россияга нисбатан қатъиятсизликда айбланди
Жозеф Байден Россияга қарши босимни кучайтириш ҳақидаги сайловолди ваъдасини бажармади. “National Review” журналисти Жим Жерати Байденнинг президент этиб сайланганидан кейин Россияга нисбатан муносабатига ана шундай баҳо берди.
Унга кўра, Байден президент этиб сайланганидан сўнг Владимир Путинга қўнғироқ қилиб, Россия таҳдидларига қарши экани, АҚШ миллий манфаатларини ҳимоя қилишини айтган. Бундан сўнг АҚШ етакчиси 2016 йилги сайловларга аралашгани учун Россияни “товон тўлаш”га мажбур қилмоқчи эканини билдирган. Аммо Жим Жератининг фикрича, шундан кейин Байден бу борада қатъийлик кўрсатмаган. Муаллиф бунга Байден маъмуриятининг 2021йил апрелида Россияга қарши янги санкциялар жорий этиб, июнь ойида Россия — АҚШ раҳбарлари ўртасидаги учрашувдан кейин Москва билан барқарор муносабатлар ўрнатилиши эълон қилинганини мисол қилиб кўрсатган.
Шунингдек, Жим Жерати стратегик қуролларни чеклаш тўғрисидаги шартнома узайтирилиши ва “Шимолий Оқим-2” лойиҳаси бўйича АҚШ розилигида ҳам Байденни қатъиятсизликда айблаган.
Жератининг фикрича, сўнгги янгилик — АҚШ Москванинг Марказий Осиёдаги ҳарбий базаларидан фойдаланишга ҳаракат қилиши Вашингтонни Россияга қарам қилиб қўяди. Чунки шундан сўнг минтақадаги барча аксилтеррор операцияларни ўтказиш Москвага боғлиқ бўлиб қолади.
Аввалроқ АҚШ давлат котиби Энтони Блинкен Россияни ЕХҲТ йиғилиши ўтмаганлигида айблаб чиққанди. Шунингдек, АҚШ Россиянинг Марказий Осиёдаги базаларидан фойдаланишни сўрагани хабар қилинганди.
Жаҳонгир Қўзиев
