ЖССТ: Ҳомиладор аёллар ҳам COVID-19 га қарши эмланиши керак
Ташкилотга кўра, вирус ҳомиладор онадан болага юқмайди.
Коронавирусга қарши дори-дармонлар ва ваксиналар ҳомиладор аёлларда ҳам синовдан ўтказилиши керак, чунки аҳолининг ушбу тоифаси юқори хавф остида. Бу ҳақда Жаҳон соғлиқни сақлаш ташкилоти раҳбари Тедрос Адҳаном Гебреесус бўлиб ўтган брифингда маълум қилди.
"Барча мамлакатларда ҳомиладор аёллар ўз ҳаёти ва фарзандларининг ҳаётини ҳимоя қилиш учун вакциналардан фойдаланиш имкониятига эга бўлиши жуда муҳим. Шунингдек, биз ҳомиладор аёлларни янги даволаш усуллари ва клиник синовларига қўшишга чақирамиз", деди у.
Шу билан бирга, Гебреесус вируснинг она қорнида ёки туғилиш вақтида болага юқиши ҳолатлари ниҳоятда кам учрашини ва она сутида вируснинг фаол зарралари аниқланмаганини таъкидлади. Шу муносабат билан ЖССТ раҳбари COVID-19 билан касалланган аёлларни янги туғилган фарзандларидан ажратмасликка чақирди.
"Бу туғилишдан кейинги дастлабки кунларда болаларнинг соғлиғи ва фаровонлигига зарар етказиши мумкин", - деди у.
Аввалроқ ЖССТ "Omicron" штамми дунёда ҳар уч кунда икки баробарга кўпайиши ҳақида огоҳлантирганди.
