"Бизда Шимолий Корея ҳарбийлари орасида ўлдирилган ва ярадор бўлганлар борлиги тўғрисида маълумотлар мавжуд", — деди АҚШ Мудофаа вазирлиги матбуот котиби Пэт Райдер.
Украина расмийлари ҳам Шимолий Корея ҳарбийларининг Курск вилоятидаги жангларда йўқотишларга учраётгани ҳақида хабар берди. Украина разведкасига кўра, 30 нафар шимолий кореялик ҳарбий ўлдирилган ёки яраланган.
КХДР ҳарбийларининг жангларда иштирок этаётгани ҳақида Владимир Зеленский ҳам тасдиқлади. Украина президентининг айтишича, Россия ҳукумати Шимолий Корея ҳарбийлари орасидаги йўқотишларни яширишга уринмоқда.