Кустанайдаги ватандошларимиз Ўзбекистон Президенти сайловида 19 октябрь куни муддатидан олдин овоз беради

 

 

Хабарингиз бор, Ўзбекистон Республикаси Президентлигига сайлов 2021 йил 24 октябрь куни бўлиб ўтади. Сайлов куни ўз яшаш жойида бўлиш имкониятига эга бўлмаган сайловчи муддатидан олдин овоз бериш ҳуқуқига эга. 14-20 октябрь кунлари президент сайловида муддатидан олдин овоз бериш мумкинлиги ҳақида хабар бергандик. Унда муддатидан олдин овоз бериш учун сайловчи сабабини кўрсатган ҳолда тегишли сайлов участкасига ариза билан мурожаат қилади. 

 

Юртимизнинг Қозоғистондаги элчихонаси вакиллари жорий йилнинг 24 октябрь куни бўлиб ўтадиган Ўзбекистон Президенти сайловига муддатидан олдин овоз бериш нуқталарини ташкил этиш масаласини муҳокама қилиш учун Кустанай вилояти Рудний шаҳар маъмурияти, миграция хизмати ва жамоат ташкилотлари раҳбарияти билан музокаралар ўтказди.

 

"Дунё" ахборот агентлиги хабарига кўра, шаҳар мутасаддилари билан бўлиб ўтган музокаралар натижасида 19 октябрь куни Рудний шаҳрида муддатидан олдин овоз бериш нуқталарини ташкил этиш бўйича келишувга эришилди.

 

Қайд этилишича, ўзбек дипломатлари Рудний шаҳрида вақтинча ишлаётган Ўзбекистон фуқаролари билан ҳам учрашди. Ватандошларимиз билан бўлиб ўтган суҳбат чоғида Ўзбекистон Президенти сайловида муддатидан олдин овоз бериш тартиби тушунтирилди.

 

Ўзбекистон элчихонаси маълумотига кўра, юртдошларимиз учун Рудний шаҳрининг Тараққиёт ва ижод саройи биносида муддатидан олдин овоз бериш нуқтаси ташкил этилади.

 

Аввалроқ сайлов бюллетенларини Брайль алифбосида тайёрлаш таклифи, МСК раиси ўринбосари Баҳром Қўчқоров президент сайловларида қатнашадиган номзодларга нисбатан қонунчиликда белгиланган талабларда ўзгариш йўқлиги, шунингдек, Ўзбекистонда коронавирусдан даволанаётганлар президент сайловида қандай иштирок этиши ҳамда Қорақалпоғистон Республикаси, вилоятлар ва Тошкент шаҳри ҳудудларида Ўзбекистон Республикаси Президенти сайловини ўтказиш учун 14 та сайлов округи тузиш тўғрисида қарор қабул қилингани ҳақида хабар берилганди.