Мактаб ўқувчиси хонадонга ўғирликка тушди
Таҳлилларга кўра, ўсмирлар ва ёшлар ҳуқуқбузарлиги, жинояти ҳамда уларнинг жабрланувчи бўлиб қолишига икки юзга яқин омил таъсир қилар экан. Булар орасида, энг асосийси, бола яшаётган оиладаги носоғлом муҳитнинг таъсиридир.
Мутахассислар ота-оналарнинг фарзанд ахлоқидаги салбий ўзгаришлар, унинг феъл-атвори, таълим-тарбиясига эътиборсиз бўлиши бола келажаги учун жиддий хавф туғдирувчи асосий омил эканини таъкидлайди. Наманганлик 16 ёшли мактаб ўқувчисининг жиноятга қўл ургани кишини ўйга толдиради.
Жорий йилнинг 25 август куни Поп туманида яшовчи 1951 йилда туғилган фуқаро ариза билан Поп туман ИИБ ЖҚБга мурожаат қилади. Унга кўра, 22 август куни соат 11:00 дан соат 13:00 гача бўлган вақт оралиғида яшаш уйида ҳеч ким йўқлигидан фойдаланган номаълум шахс, ҳовлисига девор ошиб кириб, хонадонидаги сандиқда бўлган икки ярим миллион пул ва нархи бир миллион сўмлик “FLY” русумли уяли телефон аппаратини ўғирлаб кетганини айтади.
Олиб борилган тезкор-қидирув, суриштирув ҳаракатлари натижасида бу жиноятни шу туманда яшовчи, 9 синф ўқувчиси содир этгани аниқланган.
Мазкур ҳолат бўйича Наманган туман ИИБ ҳузуридаги ТБ томонидан жиноят иши қўзғатилган.
Эслатиб ўтамиз, аввалроқ ўғри бегона эмас, хонадон эгасининг жияни бўлиб чиққани ҳамда Тошкентда шиналар ўрнига ғишт қўйиб кетаётганлар қўлга олингани ҳақида хабар берилганди.
Баҳринисо Мадумарова
