Мирзо Улуғбек ҳақидаги ҳужжатли фильм намойиш этилди
Президент ташаббуси билан қайта тикланган Тошкент халқаро кинофестивали дастурида бугун Голливудда ижод қилаётган ўзбек режиссёри Баҳодир Йўлдашевнинг "Улуғбек ёҳуд Осмон тоқига қўйилган нарвонʼʼ номли янги ҳужжатли фильм премьераси бўлиб ўтди.
Кинематография агентлиги ахборот хизматининг хабар беришича, ушбу ҳужжатли фильм Шарқнинг буюк мутафаккири, Мовароуннаҳр ҳукмдори Мирзо Улуғбек ҳаёти ва илмий мероси ҳақида ҳикоя қилади.
Қайд этилишича, фильмда Венсан Кассель, Арманд Ассанте, Франсиско Овалье каби дунёга машҳур санъаткорлар, шунингдек, Маъруф Отажонов, Жавоҳир Зокиров, Ҳошим Арслонов сингари ўзбекистонлик таниқли актёрлар роль ижро этган.
Мазкур кинокартина 2017 йилда 74-Халқаро Венеция кинофестивалида "Энг яхши хорижий ҳужжатли фильм" номинациясида нуфузли "Кинео" мукофотига сазовор бўлган, Италиянинг Искя оролида бўлиб ўтган халқаро кинофестивалда “Энг яхши ҳужжатли фильм” номинациясида ғолибликни қўлга киритган.
Эслатиб ўтамиз, кинофестиваль бош ҳомийси: AGMK, NGMK вa “O‘zbekneftgaz”. Ҳамкор ҳомийлар: “O‘ZBEKTELEKOM”, “O‘zdonmahsulot” AK, “O‘zpromstroybank”ATB, “Ipoteka-bank” ATIB, “Asakabank”AJ, “O‘zbekiston temir yo‘llari”, “Hududgazta’minot”, “UzAuto Motors”AJ, “O‘zmetkombinat” AJ, “Milliy bank”AJ, “Farg’onaazot”AJ, “Eriell”, “Bosch” TM, “Easy Booking”.
Аввалроқ Ўзбекистон, Қозоғистон ва Россия ҳамкорлигида Хўжа Насриддин ҳақида мултфильм суратга олиниши, С.А. Герасимов номидаги Бутунроссия давлат кинематография институти (ВГИК)нинг Тошкент филиали очилгани, Ўзбекистонга Раж Капур бюсти тақдим этилгани ҳамда Ўзбекистон кинематография агентлиги Россия, Тожикистон, Қозоғистон давлатлари билан келишувга эришгани ҳақида хабар берилганди.
