Наманганда "Lacetti"дан ҳужжатсиз 80 миллион сўмлик дори-дармон топилди
Айни пайтда четдан сифатсиз дори-дармон кириб келишига қарши мунтазам кураш олиб борилаётганига қарамай, уларнинг юртимизга турли қинғир йўллар билан кириб келиши давом этмоқда.
Хусусан, Наманган вилояти божхона бошқармаси контрабандага қарши курашиш ва божхона аудити бўлими ДХХ ходимлари билан ҳамкорликда сифати кафолатланмаган дори воситаларининг ноқонуний айланмасига чек қўйди. Бу ҳақда Zamon.uz'га Давлат божхона қўмитаси раисининг ахборот сиёсати бўйича маслаҳатчиси Нурбек Саломов маълум қилди.
Янгиқўрғон туманининг чегара олди ҳудудида ўтказилган тезкор тадбир давомида фуқаро М.Б. бошқарувидаги "Lacetti" русумли автотранспорт воситаси тўхтатилиб, кўздан кечирилганда унинг юкхонасида ҳужжатсиз, умумий қиймати 80 миллион сўмлик хорижда ишлаб чиқарилган 22 минг 237 дона дори-дармон борлиги аниқланиб, ашёвий далил тариқасида вақтинча сақловга олинди.
Ҳозирда мазкур ҳолат юзасидан божхона органлари томонидан суриштирув ҳаракатлари олиб бормоқда.
Аввалроқ Тошкент вилоятининг Оҳангарон туманидан “KIA BONGO” русумли транспорт воситасидан ҳеч қандай ҳужжатларсиз, катта миқдорда 50 турдаги дори воситалари аниқлангани ҳақида хабар берган эдик.
Муножат Валиева
