Наманганлик йигит Тожикистондаги автоҳалокатда вафот этди
У Mercedes-Benz билан катта тезликда ҳаракатланган ва темирйўл тўсиғига урилган.
Тожикистонда содир бўлган даҳшатли йўл-транспорт ҳодисасида Ўзбекистон фуқароси ҳалок бўлди. Бу ҳақда «Спутник» нашри ёзмоқда.
Воқеа Зарафшон микрорайонидан ўтувчи Зарнисор кўчаси чорраҳасида (Душанбе) содир бўлган.
Ўзбекистонлик ҳайдовчи катта тезликда темирйўл тўсиғига урилган. Оқибатда машина икки қисмга бўлиниб кетган. Маълумотларга кўра, бахтсиз ҳодиса 17 мартдан 18 мартга ўтар кечаси содир бўлган.
Ҳуқуқ-тартибот идоралари ходимлари томонидан Аниқланишича, Mercedes-Benz русумли автомобиль ҳайдовчиси бошқарувни йўқотиб қўйган, оқибатда у воқеа жойида вафот этган.
Душанбе ички ишлар вазирлиги марҳумнинг шахсини аниқлаган — у Ўзбекистон фуқароси, Наманган вилоятида яшовчи 23 ёшли йигит бўлган.
Ҳуқуқ-тартибот идоралари ходимлари ҳодиса юзасидан суриштирув ишларини давом эттирмоқда.
