Навбат Туркияга. "Толибон" делегацияси Анқарага учиб кетди
“Толибон” делегацияси Қатардан Анқарага учиб кетди. Бу ҳақда Афғонистон Ташқи ишлар вазирлиги расмий вакили Абдулқодир Балхий хабар берди.
Балхийнинг маълумотларига кўра, делегация Туркияга ташқи ишлар вазири Мавлуд Чавушўғлу таклифига биноан ташриф буюради. Унда олий мартабали амалдорлар билан учрашувлар бўлиб ўтади.
Томонлар савдо, гуманитар ёрдам, миграция ва авиатранспорт билан боғлиқ масалаларни муҳокама қилади. “Толибон” делегацияси таркибидан Tашқи ишлар вазири вазифасини бажарувчи Амирхон Мутаққий, Aхборот ва маданият вазири Хайрулла Хайрхва, Муҳаммад Суҳайл Шахин, Нур Жалол Жалолий, мулла Абдулҳақ Восиқ ҳам ўрин олган.
Туркия “Толибон” билан муносабатлар ҳақида бир неча бор баёнот берган. Хусусан, президент Ражаб Тоййиб Эрдўған “катта йигирмалик” йиғилишида Афғонистон бўйича ишчи гуруҳ тузишни таклиф қилган. Шунингдек, у “Толибон” ҳукуматининг муваффақиятсизликка учраганини айтиб ўтган.
Аввалроқ "Толибон" Ғарб давлатларидан санкцияларни бекор қилишни сўрагани хабар қилинганди.
Жаҳонгир Қўзиев
