Навоийда ўзбошимчалик билан симёғочга чиққан йигит ток уриши оқибатида ҳалок бўлди
Навоий вилояти Навбаҳор тумани «Янгийўл» маҳалласида симёғочга электр қурилмаларни эксплуатация қилиш учун чиққан О.А. исмли йигит ток уриши оқибатида ҳалок бўлди. Бу ҳақда «Навоий ҳудудий электр тармоқлари корхонаси» АЖ ахборот хизмати хабар берди.
Қайд этилишича, О.А. 1 август куни соат 09:30 лар атрофида электр қурилмаларни эксплуатация қилишда хавфсизлик техникаси қоидалари талабларини бажармасдан ва ўзбошимчалик билан тармоқни ўчирмасдан симёғочга чиққан.
Tармоқ «Янгиқўрғон» подстанциясидан чиқувчи 10 киловаттли Оҳунбобоев шохобчасига уланган трансформатордаги автоматга уланган. Техник ҳолати ҳозирги кунда қониқарли аҳволда бўлган.
«Бунинг оқибатида кучланиш остига тушишини билган ҳолда ушбу ишни бажаргани аниқланди. Бу билан хавфсизлик техникаси қоидаларини қўпол равишда бузган», — дейилади хабарда.
Шу билан бирга, ҳодиса жойи ходимлар томонидан ўрганилганда хавфсизлик техникаси ва электр ускуналарни эксплуатация қилиш қоидаларидан четга чиқиш ҳолатлари аниқланмаган.
