Оёғи синган йигит «пешеход»да пранк олди
Йигитга нисбатан майда безорилик моддаси билан маъмурий баённома расмийлаштирилиб, судга юборилди.
Ижтимоий тармоқларда йигит кишининг Чилонзор туманида жамиятда юриш-туриш қоидаларини бузганлигини акс этган видео тарқалиб, кўплаб муҳокамаларга сабаб бўлди. Мазкур ҳолат юзасидан Тошкент шаҳар ИИБ маълумот берди.
Маълум қилинишича, 31 май куни Чилонзор тумани, «Чилонзор» метро бекати олдидаги йўл қатнов қисмининг пиёдалар ўтиш жойида, 2004 йилда туғилган йигит ҳамда ушбу «пранк»ни тасвирга олишга жалб қилинган таниши 2000 йилда туғилган шахс, жамиятда юриш-туриш қоидаларини қасддан менсимасдан, гўёки ўзини оёғи синган ҳолатда кўрсатиб, йўл қатнов қисмида сунъий тирбандлик содир этган ҳамда йўл ҳаракати қатнашчиларининг ҳаётини хавф остига қўйган.
Мазкур ҳолат юзасидан Чилонзор тумани ИИО ФМБ томонидан ушбу фуқароларга нисбатан Маъмурий жавобгарлик тўғрисидаги кодекснинг 183-моддаси («Майда безорилик») билан маъмурий баённома расмийлаштирилиб, қонуний чора кўриш учун ҳужжатлар Жиноят ишлари бўйича Чилонзор туман судига юборилган.
