Ўзбекистоннинг доимий вакили номзоди кўрсатилган Осиё-Тинч океани минтақаси БМТ ИҲК тизимидаги энг йириклардан бири ҳисобланади. Гуруҳда 56 та давлат бор. БМТ Инсон ҳуқуқлари бўйича кенгаши бюроси таркиби ИҲК раиси ҳамда унинг турли географик гуруҳлардан сайланган тўртта ўринбосаридан ташкил топган.
Ташқи ишлар вазирлиги ахборот хизмати хабарига кўра, Осиё-Тинч океани минтақавий гуруҳига аъзо давлатлар Ўзбекистоннинг Женева шаҳридаги БМТ бўлинмаси ва бошқа халқаро ташкилотлардаги доимий вакили номзодини 2022 йил учун БМТ Инсон ҳуқуқлари бўйича кенгаши раисининг ўринбосари лавозимига бир овоздан қўллаб-қувватлади.
Қайд этилишича, Ўзбекистон вакилининг ушбу лавозимга сайланиши республикамизда инсон ҳуқуқлари соҳасида амалга оширилаётган кенг кўламли ислоҳотларнинг жаҳон ҳамжамияти томонидан ижобий баҳоланаётганининг ифодасидир.
Маълумот учун: 2020 йилда Ўзбекистон 2021-2023 йиллар мобайнида БМТ Инсон ҳуқуқлари бўйича кенгашининг тўлақонли аъзоси этиб сайланган ва ташкилот доирасида фаол иш олиб бормоқда.
Эслатиб ўтамиз, кенгаш мажлислари БМТнинг Женевадаги ваколатхонасида ўтказилади.
БМТ ИҲК таркибига 47 давлат киради. Бутун дунё бўйлаб инсон ҳуқуқларини илгари суриш ва ҳимоя қилишга масъул тузилма ҳисобланади. Кенгаш ваколатига инсон ҳуқуқлари соҳасидаги эътиборга молик бўлган барча масалалар ва вазиятларни муҳокама қилиш киради.
Аввалроқ БМТнинг тавсиялари ҳаётга татбиқ этилаётгани, Ўзбекистон навбатдаги халқаро шартномага қўшилгани ҳамда БМТнинг дин ва эътиқод эркинлиги бўйича махсус маърузачиси Ўзбекистонга ташриф буюриши ҳақида хабар берилганди.