Ўзбекистондан Афғонистонга темир йўл қатнови вақтинча тўхтатилди
Қайд этилишича, Афғонистон темир йўл бошқармаси икки мамлакат ўртасидаги “Ҳаракатлар режаси” бўйича келишилган чора-тадбирларни ўз вақтида амалга ошира олмаган.
“Ўзбекистон темир йўллари” АЖнинг хабар беришича, Ўзбекистондан Афғонистонга темир йўл қатнови вақтинча тўхтатилади.
Қайд этилишича, Афғонистон темир йўл бошқармаси икки мамлакат ўртасидаги “Ҳаракатлар режаси” бўйича келишилган чора-тадбирларни ўз вақтида амалга ошира олмаган. Шу сабабли 1 февралдан бошлаб Афғонистонга темир йўл қатнови вақтинча тўхтатилади.
Хабарда маълум қилинишича, ўтган йилнинг 26-30 декабрь кунлари Термиз шаҳрида ўтказилган музокаралар давомида 2023 йилнинг 1 февралига қадар Афғонистон ҳудудидаги техник ишларни босқичма-босқич Афғон темир йўллари ишчилари томонидан амалга оширилиши бўйича келишилган эди.
Шунингдек, “Сўғдиёна Транс” ШК ва Афғон темир йўл бошқармаси ўртасида томонлар бажарадиган ишлар рўйхати ҳам тасдиқланган. Икки томон 27 январга қадар янги шартнома имзоланишига келишиб олган ҳамда тегишли баённома имзоланган.
Маълумот учун, Афғонистондаги Ҳайратон–Мозори Шариф темир йўли 2010 йилда қурилган. 2011 йилдан бошлаб Ҳайратон–Мозори Шариф темир йўлининг барча хизматлари “Сўғдиёна Транс” ШК томонидан амалга оширилмоқда.
