1 январдан пенсия ва нафақа олувчилар пулни танлов асосида олиши мумкин. Бунда тижорат банки ва бошқа ихтисослашган ташкилотларга пенсия ҳамда нафақаларни нақд пулда маҳалла фуқаролар йиғинларига, фуқароларнинг яшаш манзилларига етказиб бериш мажбурияти юклатилади.
Маълумот учун, пенсиялар, ижтимоий нафақалар, компенсациялар ва бошқа тўловларни тўлаш тартиби ҳар уч йилда алоҳида ўтказиладиган тендер асосида амалга оширилади. Бунда тўлов жараёнларини белгиланган муддат бўйича танланган тижорат банки ва бошқа ихтисослашган ташкилотлар амалга оширади. Мазкур тижорат банки ёки ихтисослашган ташкилотлар Қорақалпоғистон Республикаси, вилоятлар ва Тошкент шаҳри бўйича алоҳида ўтказиладиган тендер асосида танлаб олинади.
Бундан ташқари, 2022 йил 1 июлдан давлат пенсияларини тайинлашда фуқаролардан меҳнат стажи, иш ҳақи, ОТМдаги ўқиш ҳамда ҳарбий хизмат даври тўғрисидаги ҳужжатларни талаб қилиш бекор қилинади. Бунинг ўрнига "Ягона меҳнат миллий тизими" идоралараро дастурий-аппарат комплекси (ЯММТ ИДАК) хизмати жорий этилади. Мазкур тизимнинг қулайлиги шундаки, агар пенсияга чиқиш ҳуқуқи пайдо бўлса, ишламайдиган фуқароларга ўзларининг меҳнат дафтарчаларидаги меҳнат стажи тўғрисидаги маълумотларни тизимга киритиши кифоя.
Эслатма. "Ягона меҳнат миллий тизими" билан боғланиш учун Бандликка кўмаклашиш марказларига мурожаат қилиш керак. давлат пенсияларини тайинлаш ЯММТ ИДАКга киритилган электрон маълумотлар асосида амалга оширилади.
Меҳнат стажи, иш ҳақи, олий таълим муассасаларидаги ўқиш ҳамда ҳарбий хизмат даври тўғрисидаги ҳужжатлар Пенсия жамғармаси томонидан "Ягона меҳнат миллий тизими"дан фойдаланган ҳолда электрон маълумотлар алмашинуви асосида олинади.
Шунингдек, 2022 йил 1 июлга қадар қариялар ва кекса ёшдагилар, имконияти чекланган ва ногиронлиги бўлган шахсларга хизмат кўрсатишга мослаштирилган Пенсия жамғармасининг бинолари бўйича минимал талабларга асосан ҳар бир ҳудудда биттадан Пенсия жамғармасининг мавжуд бинолари негизида “Намунали Пенсия жамғармаси бўлими” ташкил этилади.
Аввалроқ энг кам ёшга доир пенсия, иш ҳақи ва яна шунга ўхшаш нафақалар ҳамда “Болалар пули”ни олиш оила аъзоларига тақсимланадиган ойлик даромадга боғлиқлиги ҳақида хабар берилганди.
Оламгир Абдиев