Тадбирдан мақсад — иммунология ҳамда замонавий тиббий генетика асосларининг долзарб муаммолари ва тенденцияларини аниқлашдан иборат. Шунингдек, йиғилиш маҳаллий ва хорижий олимларнинг тадқиқотлари, илмий-техник ишланмалари билан танишиш, мутахассислар ўртасида илмий ва ишчи алоқаларни ўрнатиш, иқтидорли ёшларни жалб қилиш, истиқболли илмий лойиҳалар устида ишлашни ҳам ўз ичига олади.
Анжуман офлайн ва онлайн тарзда Тошкент ва Самарқандда ўтказилиши режалаштирилмоқда. Конференция давомида аллергология бўйича давра суҳбатлари ва мунозаралар ташкил этилади. Унда дунёнинг 10 га яқин мамлакатларидан 250 дан ортиқ етакчи экспертлар, олимлар ва ёш тадқиқотчилар иштирок этишади. Конференция 3 кун, 14-16-октябрь кунлари ўтказилади.
Маълумот учун, институт 1985 йилда ташкил этилган бўлиб, у Марказий Осиёда ягона ҳисобланади. Унга асос солганлар — академиклар Рем Петров, Раҳим Хаитов ва Ўктам Ариповлардир.
Институтнинг илмий салоҳиятини 60 та илмий ходим, шу жумладан, 16 та фан доктори, 10 та фан номзоди ва 1 та академик ташкил этади. Бугунги кунда у мамлакатнинг етакчи илмий муассасаларидан бири бўлиб, иммунология, аллергология ҳамда инсон геномикаси соҳасида фундаментал тадқиқотлар ва ишланмаларни олиб боради.
Бугунги кунда Европа Иттифоқи жамғармаси кўмагида Ўзбекистондаги ягона халқаро биобанк ташкил этилган. Унда ҳужайралар намуналари ва Марказий Осиёда яшовчи халқларнинг ДНК намуналари мавжуд. Бу генетик панелларни ҳар томонлама ўрганиш ва ишлаб чиқиш ҳамда сурункали касалликларининг генетик паспортларини яратиш имконини берди.
Аввалроқ Ўзбекистонга саратон касалликларини даволашда ёрдам берилиши, айрим тиббий буюмлар ишлаб чиқариш учун лицензия талаб қилинмаслиги ҳамда Тошкентнинг 11 туманида беморларни коронавирусга қарши даволаш поликлиникалари ташкил этилгани ҳақида хабар берилганди.
Оламгир Абдиев