Халқ депутатлари Тошкент шаҳар кенгаши раисининг ўринбосари Тошпўлат Матибаев пойтахтнинг собиқ ҳокими Жаҳонгир Ортиқхўжаевга мурожаатнома эълон қилинганини инкор этувчи баёнотни эълон қилди.
Тошкент шаҳар халқ депутатлари кенгаши ўзининг Telegram каналида аҳолини электр энергияси ва газ билан таъминлашда юзага келган инқироз фонида Президент томонидан ишдан бўшатилган мазкур кенгашнинг собиқ раиси, пойтахт ҳокими Жаҳонгир Ортиқхўжаевга қисқа мурожаат эълон қилганди. («Gazeta.uz» мазкур хабарнинг скриншоти ва унинг нашр этилганини тасдиқловчи каналга ҳаволани эълон қилди.) Кейинроқ хабар ўчирилган.
«Ҳурматли Жаҳонгир Обидович Ортиқхўжаев, 2019−2023 йилларда Халқ депутатлари Тошкент шаҳар кенгаши раиси сифатидаги фаолиятингиз давомида Халқ депутатлари Тошкент шаҳар кенгаши депутатларини қўллаб-қувватлаганингиз учун ташаккур айтамиз», — дейилади мурожаатда.
Кенгаш раҳбари ўринбосари Тошпўлат Матибоев ўз баёнотида депутатлар номидан собиқ ҳокимга мурожаатнома эълон қилинмаганини билдирган.
«Биз бу мурожаатни қўллаб-қувватламаймиз» (хабарда ушбу қисм ҳам ўчириб ташланди — таҳр.), — дейилади баёнотда.
Шунингдек, кенгаш котибияти ўз баёнотида 16−17 январь кунлари Халқ депутатлари Тошкент шаҳар кенгашининг ҳеч қандай йиғилиши бўлиб ўтмаганини маълум қилган.