Қўйлиқ бозори кўчирилишига норозилик билдириб, машиналар йўлини тўсиб олганларга қамоқ жазоси тайинланди

 

Жорий йил 9 декабрь куни ижтимоий тармоқларда Қўйлиқ бозоридаги тадбиркорлар мазкур савдо комплексининг кўчирилишига норозилик билдириб, машиналар йўлини тўсиб олгани акс этган видео тарқалди. Видео муаллифининг изоҳ беришича, одамлар Қўйлиқ бозори йўл кенгайтирилиши ва йўл ўтказгич қурилиши муносабати билан бузилишга тушгани ва бозор ҳудудига кириш ёпиб қўйилганидан норозилик билдириб, йўлни тўсишга чиққан.

 

Мазкур ҳолат юзасидан Тошкент шаҳар ИИББ нинг маълумот беришича, беш нафар фуқаро МЖТКнинг 195-моддаси (ички ишлар органлари ходимларининг ўз хизмат бурчларини бажаришларига қаршилик кўрсатиш) ҳамда 201-моддасида (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) назарда тутилган ҳуқуқбузарликларни содир этганликда айбли деб топилиб, маъмурий баённома расмийлаштирилган.

 

Қонунда 195-моддага биноан базавий ҳисоблаш миқдорининг уч бараваридан йигирма бараваригача миқдорда жарима солишга ёки ўн беш суткагача муддатга маъмурий қамоққа олишга сабаб бўлади.

 

201-модда билан эса базавий ҳисоблаш миқдорининг олтмиш бараваридан саксон бараваригача миқдорда жаримага тортилишлари ёки ўн беш суткагача муддатга маъмурий қамоққа олинишлари мумкин.